Aqyn ärı jurnalist Qazybek İsa «Petropavldy – Abylaihan, Pavlodardy – Kenesary, Semeidı Älihan Bökeihan qalasy dep ataiyq» dep ūsynys tastaǧan bolatyn. Bır qaraǧanda oryndy ūsynys bolǧanymen özınıŋ tarihi atauy bar qalany tūlǧanyŋ atymen atau qanşalyqty dūrys? Jalpy qazaqtyŋ tanymy ülken qalaǧa belgılı bır tūlǧanyŋ atyn berudı kötere me?
Qazybek İsa Pavlodardy – Kenesary dep auystyraiyq dese, belgılı tıl janaşyry Ruza Beisenbai Pavlodardyŋ Täşenov dep atalǧanyn qalaidy. Tıptı keibır azamattar Petropavl men Pavlodardy Jänıbek pen Kerei dep ataiyq dep ūsynys tastapty. Al juyrda jurnalist Erman Qanjanūly Qaratau qalasyn D.Qonaev dep özgerteiık dep äleumettık jelıge öz pıkırın jazdy. Bır qyzyǧy äleumettık jelıdegı azamattardyŋ 90 paiyzy būl ūsynysty qoldap, tıptı «Qonaevqa Almatynyŋ da atyn beruge bolady» dep pıkır bıldırıptı.
Belgılı qalamger Marat Toqaşbaev tūlǧanyŋ atyn qalaǧa beruge qarsy. Alaida ol Petropavl men Pavlodardyŋ atyn ūlttyq sipatqa özgertu kerek degen pıkırde
«Menıŋ oiymşa Semeidı öz atymen qaldyru qajet. Al qos qalany Abylhan men Kenesary dep özgertu dūrys emes. Bızdıŋ Parlament «Jeke adamdardyŋ atyn qala men eldımekenderge qoiuǧa bolmaidy» degen zaŋ şyǧarsa jaqsy bolar edı. Sonda bız Nūr-Sūltan, Petropavl, Pavlodar degen ataulardan qūtylatyn bolamyz. Eger osyndai zaŋ şyǧatyn bolsa, sız köterıp otyrǧan tüitkıldı mäseleler oŋ şeşıledı. Al Jambyl oblysyna qarasty Qaratau qalasyn Qonaev dep ataudyŋ eşqandai qajettılıgı joq. Öitkenı halyqtyŋ qūlaǧyna äbden sıŋıstı bolǧan qalanyŋ atyn auystyryp abyroi tappaimyz», – deidı ol.
Marat Baidıldaūly qalaǧa adamnyŋ atyn beru orys pen amerikandyqtardan şyqqanyn aitady. Alaida būl jaǧdai qazaqtyŋ tanymyna qaişy keletının aitady.
«1797 jyly Jordj Vaşington ekı merızım prezident bolyp, halyq üşınşı ret sailauǧa tüsuın sūraǧanda «Men Konstutsiiany būzsam, ony qalpyna keltıru qiyn bolady. Sondyqtan Konstutsiiany saqtaiyq» dep prezidenttıkke tüsuden bas tartady. Onyŋ būl ūstanymyna riza bolǧan halyq aty joq şaǧyn qalaşyqqa Vaşingtonnyŋ atyn beruge rūqsat sūraidy. Ol prezidenttık sailauǧa tüspes üşın kelısımın berıp, konstitutsiiany saqtap qalady. Menıŋ oiymşa, qalany adamnyŋ atymen qoiu osydan bastaldy. Sodan keiın Petr I qūrmetıne Sankt-Peterburgtyŋ aty berıldı. Şyn mänısınde qazaqtyŋ tanymyna adamnyŋ atyn qala men eldımekenderge beru kelıŋkıremeidı», – deidı ol.
Sondai-aq ol äleumettık jelıdegı «Elordamyz astanany Alaşorda dep ataiyq» degen ūsynysty qoldaitynyn jetkızdı. Sebebı alaş arystarynyŋ qūrmetıne orai elımızdıŋ ortalyǧyn Alaşorda dep atau tarihi ädılettılık ekenın eskerttı.
Künı keşe «JEBE» qoǧamdyq bırlestıgınıŋ müşelerı QR Parlamentı Mäjılısınıŋ deputaty Aizada Qūrmanovamen kezdesıp, Pavlodar qalasynyŋ atauyn Ertıs dep özgertu turaly ūsynys tastady. Qisyndy ūsynys. Öitkenı keibır azamattar atalǧan qalanyŋ Kereku degen atauy Koriakovtan şyqqan dep aityp jür. Būl jerde tarihşylardyŋ uäjıne qūlaq asqan jön. Al Petropavldyŋ Qyzyljar ekenın tarihşy Ziiabek Qabyldinov naqty qūjattarmen däleldep berdı.Toqsan auyz sözdıŋ tobyqtai tüiını, qala, audan jäne eldımekenderdıŋ atyn tūlǧanyŋ atymen atamauymyz kerek.
Serık Joldasbai,
"Adyrna" ūlttyq portaly
