Qytaıdaǵy qazaq rejısseri halyqaralyq festıvaldiń jeńimpazy atandy

2268
Adyrna.kz Telegram

«Sahara muraǵattary» atty bul derekti fılmge Altaı óńirindegi Shemirshek mádenıeti arqaý bolǵan. Baıyrǵy kóshpendiler mádenıeti qalǵan asqar Altaı taýynyń baýraıy tarıhı jádigerlerge toly. Ondaǵy neshe júzdegen balbal tastar, myńdaǵan jartas sýretteri, «Myqtyń úıi» (qorymdar) men kóne jurttar ata-babamyzdyń tarıhynan syr shertip, tól shejiremizden til qatyp tur.

Bul dalada Ǵundar men Saqtar ot jaǵyp, ómir súrgen, túrkilerdiń at tuıaǵynyń izi qalǵan, ol qazaqty quraǵan rý-taıpalardyń eski jurty. Rejısser osy taqyryp tóńireginde izdenis jasap, 2013 jyldan bastap Altaı qalalyq ákimdiktiń qoldaýymen tarıhı orynnyń tórt maýsymdaǵy tabıǵatyn kamera kózine túsire bastaıdy. Sondaı-aq, Qytaıdaǵy Jaqyp Myrzahanov, Shadyman Ahmetuly, Ýań Bo, Ýı Janjún qatarly tanymal tarıhshylar men arheologtarar taqyryp tóńireginde áńgime órbitip, bul jerdiń baıyrǵy qazaqty quraǵan rý-taıpalardyń mekeni ekendigin, sondaı-aq, olardyń ózine tán mádenıet jaratqandyǵyn dáleldeıdi.

Qýandyq Kóbenuly Qytaıdaǵy eń úlken qazaq telearnasy – XJTV arnasynyń jýrnalısi, «Gúlder-aı» baǵdarlamasynyń prodıýseri. Onyń «Qatıpanyń bir jyly», «Arys júldegeri», «Bir ǵasyr», «Tarıh tańbalary», «Baıyrǵy Jibek jolyndaǵy Tekes», «Asyl meken Alaqaq» sııaqty týyndylary sondaǵy kórermenniń ystyq yqylasyna bólengen. Ásirese «Tarıh tańbalary» atty 8 bólimdi derekti fılmi mamandardyń joǵary baǵasyn alǵan bolatyn. Sondaı-aq, ol ótken jyly Qytaıdaǵy derekti fılm salasynyń eń joǵary «Jılý Juńgo» syılyǵyn ıelendi.

Aıta keteıik, «Altyn panda» halyqaralyq derekti fılm festıvali 1991 jyldan bastap ótkizilip keledi. Bıylǵy baıqaýǵa Anglııa, Japonııa, Ońtústik Koreıa, Avstralııa sııaqty 41 memleketten 917 derekti fılm qatysypty. Teletýyndylar áleýmettik, gýmanıtarlyq, tabıǵat taqyryptary boıynsha saralanyp, 6 qarasha kúni Sychýan ólkesiniń Chyńdý qalasynda ótken marapattaý rásiminde 10 derekti fılmge júlde berildi.


baq.kz

 

Pikirler