«ساحارا مۇراعاتتارى» اتتى بۇل دەرەكتى فيلمگە التاي وڭىرىندەگى شەمىرشەك مادەنيەتى ارقاۋ بولعان. بايىرعى كوشپەندىلەر مادەنيەتى قالعان اسقار التاي تاۋىنىڭ باۋرايى تاريحي جادىگەرلەرگە تولى. ونداعى نەشە جۇزدەگەن بالبال تاستار، مىڭداعان جارتاس سۋرەتتەرى، «مىقتىڭ ءۇيى» (قورىمدار) مەن كونە جۇرتتار اتا-بابامىزدىڭ تاريحىنان سىر شەرتىپ، ءتول شەجىرەمىزدەن ءتىل قاتىپ تۇر.
بۇل دالادا عۇندار مەن ساقتار وت جاعىپ، ءومىر سۇرگەن، تۇركىلەردىڭ ات تۇياعىنىڭ ءىزى قالعان، ول قازاقتى قۇراعان رۋ-تايپالاردىڭ ەسكى جۇرتى. رەجيسسەر وسى تاقىرىپ توڭىرەگىندە ىزدەنىس جاساپ، 2013 جىلدان باستاپ التاي قالالىق اكىمدىكتىڭ قولداۋىمەن تاريحي ورىننىڭ ءتورت ماۋسىمداعى تابيعاتىن كامەرا كوزىنە تۇسىرە باستايدى. سونداي-اق، قىتايداعى جاقىپ مىرزاحانوۆ، شادىمان احمەتۇلى، ۋاڭ بو، ۋي ءجانجۇن قاتارلى تانىمال تاريحشىلار مەن ارحەولوگتارار تاقىرىپ توڭىرەگىندە اڭگىمە ءوربىتىپ، بۇل جەردىڭ بايىرعى قازاقتى قۇراعان رۋ-تايپالاردىڭ مەكەنى ەكەندىگىن، سونداي-اق، ولاردىڭ وزىنە ءتان مادەنيەت جاراتقاندىعىن دالەلدەيدى.
قۋاندىق كوبەنۇلى قىتايداعى ەڭ ۇلكەن قازاق تەلەارناسى – XJTV ارناسىنىڭ ءجۋرناليسى، «گۇلدەر-اي» باعدارلاماسىنىڭ پروديۋسەرى. ونىڭ «قاتيپانىڭ ءبىر جىلى»، «ارىس جۇلدەگەرى»، «ءبىر عاسىر»، «تاريح تاڭبالارى»، «بايىرعى جىبەك جولىنداعى تەكەس»، «اسىل مەكەن الاقاق» سياقتى تۋىندىلارى سونداعى كورەرمەننىڭ ىستىق ىقىلاسىنا بولەنگەن. اسىرەسە «تاريح تاڭبالارى» اتتى 8 ءبولىمدى دەرەكتى ءفيلمى مامانداردىڭ جوعارى باعاسىن العان بولاتىن. سونداي-اق، ول وتكەن جىلى قىتايداعى دەرەكتى فيلم سالاسىنىڭ ەڭ جوعارى «جيلۋ جۇڭگو» سىيلىعىن يەلەندى.
ايتا كەتەيىك، «التىن پاندا» حالىقارالىق دەرەكتى فيلم فەستيۆالى 1991 جىلدان باستاپ وتكىزىلىپ كەلەدى. بيىلعى بايقاۋعا انگليا، جاپونيا، وڭتۇستىك كورەيا، اۆستراليا سياقتى 41 مەملەكەتتەن 917 دەرەكتى فيلم قاتىسىپتى. تەلەتۋىندىلار الەۋمەتتىك، گۋمانيتارلىق، تابيعات تاقىرىپتارى بويىنشا سارالانىپ، 6 قاراشا كۇنى سىچۋان ولكەسىنىڭ چىڭدۋ قالاسىندا وتكەن ماراپاتتاۋ راسىمىندە 10 دەرەكتى فيلمگە جۇلدە بەرىلدى.
