Törtqara Bäimen bidıŋ zamanynda Jansügır degen bai bolypty. Ekeuı Temırastaudaǧy bır qopaǧa dauly bolypty. Sol kezde Arystan degen pravitel (aǧa sūltan) eken, soǧan aitysa barypty. Jansügır bai pravitelge paraǧa toǧyz aq nar berıptı, pravitel para bergen baiǧa törelık būiyryp, jerdı soǧan beruge bilık ısteptı. Bäimen Jansügırdıŋ paraǧa toǧyz aq nar bergenın bılıp qalyp, pravitelge kelıp bylai deptı:
«İä, törem, sız törelıktı aqqa bermeidı ekensız. Qaraǧa da bermeidı ekensız, paraǧa beredı ekensız. Men el jisam da Jansügırdei mal jimaǧan ekenmın, mal jisam da nar jimaǧan ekenmın, nar jinasam da aq jimaǧan ekenmın. Jaraidy, maǧan qaida barsam da sızdei han tabylar. Sızge bıraq mendei qaraşy tabyla qoimas, sızge joldastyqqa mal kerek bolsa, ony körersız, er kerek bolsa ony körersız», – deptı de ökpelep Qazalyǧa köşıp ketıptı. Künderden-künder, jyldardan-jyldar ötkende pravitel Bäimen bidıŋ qadırı ötıp, bidıŋ keŋesın saǧynyp, artynan ädeiı atpen adam jıberıp, tartuǧa at pen şapan berıp, sälem aitypty. Esenşaǧaldyŋ qūmyn alyp bermek bolyp zorǧa şaqyrtyp alypty. Kelgensın pravitel Bäimenge: «Bieke, ǧafu ete gör, qadırıŋ öttı, kısıge mal serık emes, el serık eken, elde qadırındı bıletın er serık eken. Men adasqan ekenmın, narǧa qyzyqqanym nadandyǧym eken, ardy oilamaǧanym aqylsyzdyǧym eken maldan el qymbat eken, elde er qymbat eken, erden ar qymbat eken», – deptı.
