Ózbekstannyń birinshi prezıdenti Islam Karımovtyń qyzy Gúlnara Karımova Tashkent oblysynyń Zangıatın aýdanynda ornalasqan №41 túzetý mekemesine aýystyryldy, dep habarlaıdy "Adyrna" ulttyq portaly Orda.kz-ke siltep.
Buǵan deıin Karımova №21 áıelder kolonııasynda jazasyn ótep kelgen. Kolonııadan keter aldynda Gúlnara Karımova jaqyn aralasqan sottalǵan áıeldermen qoshtasyp, olarmen qushaqtasqan. Ony kolonııa basshysy Gúlrýh Karımova jáne jazalardy oryndaý basqarmasynan kelgen ókilder shyǵaryp saldy.
"Gúlnara 5-6 chemodanymen baqytty kúıde ketti. Túrmede jaqyn aralasqan qurbylarymen qushaqtasyp, qoshtasty. Karımovany kolonııanyń bastyǵy Gúlrýh Karımovamen GÝIN-nen kelgender ony shyǵaryp saldy", – dedi sottalǵan áıelderdiń biri
Sottalǵan áıelderdiń aıtýynsha, Karımovanyń aýysýy 2023 jyldyń 19 jeltoqsanynda Tashkent oblysynyń Zangıatın aýdandyq sotynyń sheshimimen júzege asqan. Bul sheshim Ózbekstan qylmystyq kodeksiniń 74-baby (jazany jumsartý) negizinde qabyldanǵan.
Degenmen, Ózbekstan IIM baspasóz qyzmeti, jazalardy oryndaý departamenti jáne ombýdsmen keńsesi bul aqparatty rastaǵan joq, biraq joqqa da shyǵarmady.
Túrme qyzmetkerleriniń málimdeýinshe, Gúlnara Karımova jazasyn óteý tártibin birneshe ret buzǵan. Ol mekeme erejelerin jıi buzyp, kóptegen sógis pen eskertý alǵan. Keı derekterge sáıkes, onyń aýystyrylýy kolonııa ákimshiliginiń ótinishi negizinde júzege asqan. Karımova bul kolonııada jazasynyń úshten bir bóligin ótegen.
