Ózbekstanda Parlamentaralyq Odaq Assambleıasynyń mereıtoılyq otyrysy ótti. Forýmǵa qatysýshylar parlamentterdiń áleýmettik damý men áleýmettik ádildikti qamtamasyz etýdegi rólin talqylady. Qazaqstan Parlamentiniń delegaııasyn Májilis tóraǵasy Erlan Qoshanov bastap bardy.
Májilis spıkeri baıandamasynda atap ótkendeı, forýmnyń ǵasyrlar boıy halyqtar men mádenıetterdi toǵystyrǵan Uly Jibek jolynyń boıynda uıymdastyrylýynyń sımvoldyq máni zor. Ol Parlamentaralyq Odaqtyń 150-shi Assambleıasy taqyrybynyń ózektiligine toqtala otyryp, jańa jahandyq syn-qaterler jaǵdaıynda BUU Bas hatshysy Antonıý Gýterrısh usynǵan jańa qoǵamdyq shart ıdeıasynyń mańyzdylyǵy arta túskenine mán berdi. Erlan Qoshanov Qazaqstan onyń ıdeıasynyń ádilettilik pen yntymaqqa negizdelgen basty qaǵıdattaryn tolyq qoldaıtynyn, al parlamentter onyń júzege asyrylýynda halyq atynan ókildik etetin ınstıtýt retinde basty ról atqara alady dep esepteıdi.
«Ádilettilik Prezıdentimiz Qasym-Jomart Toqaevtyń saıası baǵdarynyń ıdeıalyq negizi sanalady. Onyń kóshbasshylyǵymen Ádiletti Qazaqstandy qurýǵa baǵyttalǵan júıeli saıası jáne ekonomıkalyq reformalar iske asyrylýda. Bul qoǵamnyń saıasatqa aralasý múmkindigin keńeıtip, áleýmettik teńsizdikti azaıtty. Inklıýzııany damytýǵa, densaýlyq saqtaý men bilimniń qoljetimdi bolýyna, ulttyq baılyqtyń ádiletti bólinýine aıryqsha nazar aýdarylýda. Munyń bári Parlament qabyldap jatqan zańdarda kórinis taýyp otyr», – dedi Erlan Qoshanov.
Májilis tóraǵasy sońǵy otyz jyl ishinde qarjy sektorynyń naqty óndiristi yǵystyryp kele jatqanyn kóptegen halyqaralyq sarapshylar atap kórsetip jatqanyna toqtaldy. Bul memlekettiń áleýmettik róliniń tómendeýine jáne jumysshylardyń quqyqtarynyń saqtalýyna keri áserin tıgizdi. Qazaqstanda, kerisinshe, barlyq azamatqa laıyqty eńbek jaǵdaıyn jasap, kásibı ósýdiń teń múmkindikterin qamtamasyz etýge erekshe kóńil bólinedi. Memleket basshysy 2025 jyldy Jumysshy mamandyqtar jyly dep jarııalady.
Qazaqstan ishki reformalardy belsendi halyqaralyq yntymaqtastyqpen ushtastyra otyryp sátti júzege asyryp keledi. Bizdiń el Ortalyq Azııa men Aýǵanstan elderi úshin Ornyqty damý maqsattary boıynsha BUU-nyń óńirlik ortalyǵyn Almaty qalasynda qurý bastamasyn usynǵan bolatyn. Osyǵan oraı Májilis tóraǵasy BUU Bas Assambleıasynyń tıisti qararyn biraýyzdan maquldaǵany úshin atalǵan uıymǵa múshe barlyq elge shynaıy rızashylyǵyn bildirdi.
Ekinshi kúni álemniń joǵary parlamenttik delegaııalaryna Ózbekstan Prezıdenti Shavkat Mırzııoev quttyqtaý sózin arnady. Ol beıbitshilik, demokratııa jáne ornyqty damý ıdeıalaryn álem boıynsha ilgeriletýge qosqan úlesi úshin Parlamentaralyq Odaqtyń rólin erekshe atap ótti.
Ózbekstan basshysy Ortalyq Azııa elderi parlamentteriniń spıkerlerin qabyldap, Assambleıaǵa qatysqandary úshin alǵys aıtty jáne óńirdegi parlamentter arasyndaǵy ózara is-qımyldy kúsheıtý jónindegi basym baǵyttardy talqylady.
Forým aıasynda Erlan Qoshanov sheteldik áriptesterimen birqatar eki jaqty kezdesý ótkizdi.
Ol Ózbekstan Respýblıkasynyń Olıı Májilisi Zań shyǵarý palatasynyń spıkeri Nýrıddın Ismoılovpen, Bahreın Koroldiginiń Ókilder keńesiniń spıkeri Ahmed Almýsalammen, Marokko Koroldigi Parlamentiniń Keńesshiler palatasynyń tóraǵasy Mohammed Ýld Errashıdpen, Úndistan Parlamentiniń Halyq palatasynyń tóraǵasy Om Bırlamen parlamentaralyq yntymaqtastyqty arttyrý máselelerin talqylady. Taraptar parlamentaralyq dıplomatııa aıasyndaǵy ózara is-áreketti nyǵaıtý, zańnama salasynda tájirıbe almasý joldaryn ortaǵa saldy.
Sondaı-aq Májilis spıkeri forým aıasynda Reseı, Ázerbaıjan, Vetnam, Grýzııa, Túrkııa jáne Qyrǵyzstan parlamentteriniń tóraǵalarymen yntymaqtastyqty tereńdetý máseleleri boıynsha pikir almasty.
Tashkentte ótken is-sharaǵa álemniń shamamen 140-tan astam elinen delegattar qatysty. Qazaqstan depýtattary negizgi sessııadan bólek, beıbitshilik jáne qaýipsizdik, turaqty damý máseleleri boıynsha komıtet otyrystaryna, áıelder parlamentarııleriniń forýmyna, «Eýrazııa» geosaıası tobynyń otyrysyna qatysty.
Qazaqstan Parlamenti Májilisiniń depýtaty Aıgúl Kuspan basqaratyn Beıbitshilik jáne halyqaralyq qaýipsizdik máseleleri jónindegi turaqty komıtettiń otyrysynda «Palestınada eki memlekettiniń qatar ómir súrýi týraly sheshimdi ilgeriletýdegi parlamentterdiń róli» atty qarar jobasy qaraldy.
Parlamentaralyq Odaq - 1889 jyly qurylǵan eń iri halyqaralyq parlamenttik uıym. Oǵan 180 eldiń parlamentteri kiredi. Qazaqstan 1993 jyldan bastap Parlamentaralyq Odaq Assambleıasyna múshe.
Parlamentaralyq Odaq Assambleıasy parlamenttik dıplomatııaǵa yqpal etedi jáne parlamentter men parlamentshilerge búkil álemde beıbit saıasatty, demokratııany jáne turaqty damýdy ilgeriletý ókilettikterin beredi.
