Amerıka Qurama Shtattarynyń qazirgi prezıdenti Donald Tramp josparly medıınalyq tekserý aıasynda kognıtıvti testileýden ótti, dep habarlaıdy "Adyrna" ulttyq portaly DW-ge silteme jasap.
78 jastaǵy saıasatker osy qadam arqyly burynǵy prezıdent Djo Baıdennen ózgeshe áreket etýdi sheshkenin aıtty. Baıden kezinde mundaı testileýden ótýden bas tartqan edi.
– Men barlyq suraqtarǵa durys jaýap bergenimnen basqa ne aıtarymdy bilmeımin, – dedi Tramp 11 sáýir kúni keshke jýrnalısterge. Alaıda ol testtiń túri men naqty nátıjeleri týraly egjeı-tegjeıli málimet bergen joq.
Donald Tramp buǵan deıin de birneshe ret kognıtıvti test tapsyrǵanyn jáne barlyq suraqtarǵa durys jaýap bergenin aıtyp keledi. Onyń aıtýynsha, bul testter onyń aqyl-oıynyń qalypty ekenin dáleldeıtin qural.
Prezıdent óziniń jalpy densaýlyq jaǵdaıy týraly da pikir bildirdi.
– Jalpy, men ózimdi óte jaqsy formada sezindim. Júregim tynysh, janym jomart, – dedi ol.
Kognıtıvti test nátıjesi 13 sáýirde jarııalanady.
Aıta keteıik, AQSh-ta prezıdentterdiń densaýlyǵyna qatysty aqparatty ashyq jarııalaý – zańmen mindettelmegenimen, jyldar boıy qalyptasqan dástúrli tájirıbe. Donald Tramp alǵashqy prezıdenttik merzimi kezinde (2017–2021) óz aqyl-oı qabileti men el basqarý jaramdylyǵyna qatysty aıtylǵan kúmánderden keıin 2018 jyly kognıtıvti testten ótken. Ol kezde Tramp 30 suraqtyń barlyǵyna durys jaýap berip, eń joǵary kórsetkishke ıe bolǵanyn maqtan tutqan edi.
