Búgin — Qazaqstannyń halyq ártisi, kıno jáne teatr ónerinde ózindik qoltańbasyn qaldyrǵan daryndy tulǵa Ámına Ómirzaqovanyń týǵan kúni.
Ol 1919 jylǵy 8 naýryzda Abaı oblysy Abaı aýdanynyń Qaraýyl aýylynda ómirge kelgen. Shyǵystan shyqqan talantty arý Lenıngrad ınstıtýtynda oqyp júrgen kezinen-aq kınoǵa túse bastaǵan. Alǵashqy fılmderi – «Komsomolsk», «Amangeldi», «Alyptyń áni», «Aq raýshan».
Oqýdy támamdaǵannan keıin 1938 jyly Vasılıı Merkýrev shákirtterimen birge Shymkent qalasynda ashqan qazaq drama teatryna jumysqa turady.
Óner adamynyń kıno álemindegi juldyzyn jaqqan týyndysy —1945 jyly túsirilgen «Abaı ánderi» fılmi. Basty róldiń biri – Ajardyń beınesin somdaıtyn aktrısany senarıı avtory Muhtar Áýezovtiń ózi bekitken.
30-dan asa kartınaǵa túsip, teatrda 150-ge jýyq beıneni somdaǵan aktrısa qalyń kópshilikke ana beınesimen tanyldy. Qazaq kınosynyń baǵa jetpes qazynasyna aınalǵan “Abaı”, “Bir aýdanda”, “Ana týraly ańyz”, “Armanym meniń”, “Aq shaman”, “Nan dámi”, “Shanhaı” fılmderinde somdaǵan beıneleri, ásirese áıgili “Taqııaly perishtede” oınaǵan Tana apaıdyń róli qalyń jurtshylyqtyń mahabbatyna áli kúnge deıin bólenip keledi.
