Bügın, 11 säuır 2025 jyly, QR Prezidentınıŋ janyndaǧy Ūlttyq ǧylym akademiiasynyŋ ışkı aulasynda, Ǧylym qyzmetkerlerı künıne arnalǧan saltanatty ıs-şara aiasynda «Sätbaev sakurasy» qaita jaŋǧyrtylyp, ekı sakura aǧaşy (Kanzan, Kiku-Shidare) otyrǧyzyldy.
Sakuralardy saltanatty otyrǧyzu räsımıne akademikter, deputattar, japondyq delegasiiasy müşelerı, ǧylymi qoǧamdastyq belsendılerı, demeuşı käsıpkerler qatysty.
«Sätbaev sakurasynyŋ» tarihy boiynşa «Aqiqat» jurnalynyŋ 2024 jylǧy 30 säuırdegı aqparatynda kelesı mälımetter keltırılgen:
«Japoniiadan kele jatqan qonaqtar Mäskeuden şyǧyp, Almatyǧa tura tartty. Halyqaralyq kedendegılerdı olardyŋ qolyndaǧy aǧaştary taŋ qaldyrdy. Deklarasiiada būl aǧaştar japon azamattary atynan qazaq ǧalymy Qanyş Sätbaevqa degen qūrmet pen razylyq üşın jıberılgen. Keŋes ükımetı men Qazaqstan basşylarynan osy sakura aǧaştaryn Qazaqstannyŋ Ǧylym akademiiasy janyna otyrǧyzudy sūrap, ötınış jazylǧan hat qosa tırkeldı. Aǧaştardyŋ şyn mänındegı japon elınıŋ simvoly bolyp sanalatyn sakura aǧaşy ekenı anyqtalǧannan keiın arnaiy oryndardyŋ kelısımımen Almatyǧa alyp ketuge rūqsat etıldı».
«Sätbaevtyŋ qūrmetıne akademiianyŋ janyna tıgılgen üş sakuranyŋ ekeuı jaiqalyp östı. Aq pen külgın, qyzǧylt tüs aralasqan sakura gülınıŋ äsemdıgıne el süisınıp, «Sätbaev sakurasy» dep atap jürdı. Jetısudyŋ klimatyna şydamai köp ūzamai qurap ne solyp qalady degen sakura aǧaştary otyz jylǧa tarta ömır sürdı. Sakura tıgılgennen keiın köp ūzamai olardy qūrtuǧa jauapkerşılık alǧan pendeler de, artynşa pärmen beruşıler de fäniden baqiǧa būiryq kelıp, attanyp kete bardy. Köp aǧaştarmen qatar boi tüzep tūrǧan ekı sakura da ornyǧyp alyp edı, ätteŋ būl ekı aǧaştyŋ tarihynan da, qasietınen de habarsyz äkımdıktegı keibır qūrylys pen jöndeu jūmystaryn basqaryp otyrǧan basşylar būlardyŋ ne örık ne şie aǧaşy ekenın ajyrata almai kesıp tastauǧa şeşım şyǧaryp qoidy. «Ana ekı örık aǧaşyn kesıp tastaŋdar, jaqynda bastalatyn jöndeu jūmystaryna kedergı keltıredı» degen joǧarydan kelgen pärmendı būiryqtan keiın qalany abattandyru qyzmetınıŋ ekı jūmysşysy men bır brigadirı kelıp, japon arularyndai būrala nazdanyp, körkı köz tartyp tūrǧan ekı sūlu talǧa ötkır baltany aiausyz sıltep tyndy».
Ūlttyq ǧylym akademiiasynyŋ ışkı aulasynda erekşe simvoldyq mänge ie «Sätbaev sakuralaryn» jaŋǧyrtu räsımı – qorşaǧan ortany qorǧauǧa üles qosu ǧana emes, sonymen qatar elımızdıŋ ǧylym tarihyna qūrmet pen taǧzym belgısı.
