بۇگىن، 11 ءساۋىر 2025 جىلى، قر پرەزيدەنتىنىڭ جانىنداعى ۇلتتىق عىلىم اكادەمياسىنىڭ ىشكى اۋلاسىندا، عىلىم قىزمەتكەرلەرى كۇنىنە ارنالعان سالتاناتتى ءىس-شارا اياسىندا «ساتباەۆ ساكۋراسى» قايتا جاڭعىرتىلىپ، ەكى ساكۋرا اعاشى (Kanzan, Kiku-Shidare) وتىرعىزىلدى.
ساكۋرالاردى سالتاناتتى وتىرعىزۋ راسىمىنە اكادەميكتەر، دەپۋتاتتار، جاپوندىق دەلەگاتسياسى مۇشەلەرى، عىلىمي قوعامداستىق بەلسەندىلەرى، دەمەۋشى كاسىپكەرلەر قاتىستى.
«ساتباەۆ ساكۋراسىنىڭ» تاريحى بويىنشا «اقيقات» جۋرنالىنىڭ 2024 جىلعى 30 ساۋىردەگى اقپاراتىندا كەلەسى مالىمەتتەر كەلتىرىلگەن:
«جاپونيادان كەلە جاتقان قوناقتار ماسكەۋدەن شىعىپ، الماتىعا تۋرا تارتتى. حالىقارالىق كەدەندەگىلەردى ولاردىڭ قولىنداعى اعاشتارى تاڭ قالدىردى. دەكلاراتسيادا بۇل اعاشتار جاپون ازاماتتارى اتىنان قازاق عالىمى قانىش ساتباەۆقا دەگەن قۇرمەت پەن رازىلىق ءۇشىن جىبەرىلگەن. كەڭەس ۇكىمەتى مەن قازاقستان باسشىلارىنان وسى ساكۋرا اعاشتارىن قازاقستاننىڭ عىلىم اكادەمياسى جانىنا وتىرعىزۋدى سۇراپ، ءوتىنىش جازىلعان حات قوسا تىركەلدى. اعاشتاردىڭ شىن مانىندەگى جاپون ەلىنىڭ سيمۆولى بولىپ سانالاتىن ساكۋرا اعاشى ەكەنى انىقتالعاننان كەيىن ارنايى ورىنداردىڭ كەلىسىمىمەن الماتىعا الىپ كەتۋگە رۇقسات ەتىلدى».
«ساتباەۆتىڭ قۇرمەتىنە اكادەميانىڭ جانىنا تىگىلگەن ءۇش ساكۋرانىڭ ەكەۋى جايقالىپ ءوستى. اق پەن كۇلگىن، قىزعىلت ءتۇس ارالاسقان ساكۋرا گۇلىنىڭ اسەمدىگىنە ەل ءسۇيسىنىپ، «ساتباەۆ ساكۋراسى» دەپ اتاپ ءجۇردى. جەتىسۋدىڭ كليماتىنا شىداماي كوپ ۇزاماي قۋراپ نە سولىپ قالادى دەگەن ساكۋرا اعاشتارى وتىز جىلعا تارتا ءومىر ءسۇردى. ساكۋرا تىگىلگەننەن كەيىن كوپ ۇزاماي ولاردى قۇرتۋعا جاۋاپكەرشىلىك العان پەندەلەر دە، ارتىنشا پارمەن بەرۋشىلەر دە فانيدەن باقيعا بۇيرىق كەلىپ، اتتانىپ كەتە باردى. كوپ اعاشتارمەن قاتار بوي تۇزەپ تۇرعان ەكى ساكۋرا دا ورنىعىپ الىپ ەدى، اتتەڭ بۇل ەكى اعاشتىڭ تاريحىنان دا، قاسيەتىنەن دە حابارسىز اكىمدىكتەگى كەيبىر قۇرىلىس پەن جوندەۋ جۇمىستارىن باسقارىپ وتىرعان باسشىلار بۇلاردىڭ نە ورىك نە شيە اعاشى ەكەنىن اجىراتا الماي كەسىپ تاستاۋعا شەشىم شىعارىپ قويدى. «انا ەكى ورىك اعاشىن كەسىپ تاستاڭدار، جاقىندا باستالاتىن جوندەۋ جۇمىستارىنا كەدەرگى كەلتىرەدى» دەگەن جوعارىدان كەلگەن پارمەندى بۇيرىقتان كەيىن قالانى اباتتاندىرۋ قىزمەتىنىڭ ەكى جۇمىسشىسى مەن ءبىر بريگاديرى كەلىپ، جاپون ارۋلارىنداي بۇرالا نازدانىپ، كوركى كوز تارتىپ تۇرعان ەكى سۇلۋ تالعا وتكىر بالتانى اياۋسىز سىلتەپ تىندى».
ۇلتتىق عىلىم اكادەمياسىنىڭ ىشكى اۋلاسىندا ەرەكشە سيمۆولدىق مانگە يە «ساتباەۆ ساكۋرالارىن» جاڭعىرتۋ ءراسىمى – قورشاعان ورتانى قورعاۋعا ۇلەس قوسۋ عانا ەمەس، سونىمەن قاتار ەلىمىزدىڭ عىلىم تاريحىنا قۇرمەت پەن تاعزىم بەلگىسى.
