Qyzylordada QR Prezıdentiniń keńesshisi Málik Otarbaevtyń, oblys ákimi Nurlybek Nálibaevtyń qatysýymen «Ulttyq quryltaı: aldaǵy maqsattar men mindetter» atty dóńgelek ústel ótti.
Aımaq basshysy óńirdiń áleýmettik-ekonomıkalyq damý barysyna toqtalyp, Ulttyq quryltaıdyń kezekti otyrysyn 2026 jyly Syr óńirinde ótkizýdiń mańyzdylyǵyn atap ótti.
«Jaqynda ǵana Býrabaıda ótken Ulttyq quryltaıda Memleket basshymyz Qasym-Jomart Kemeluly quryltaıdyń kelesi 5-shi otyrysyn Syr boıynda, kezinde Qazaq eliniń astanasy bolǵan Qyzylorda qalasynda ótkizýdi usyndy. Alqaly jıynda qabyldanǵan tarıhı sheshim aımaq jurtshylyǵynyń mereıin asqaqtatty. Prezıdentimiz halqymyzdyń «qazaq» degen baıyrǵy ataýy qaıtarylǵan, tarıhı ádildik ornaǵan Qyzylordadaǵy mańyzdy oqıǵalar el jadynda saqtalýǵa tıis ekenin atap ótti. Bul – biz úshin zor mártebe, Prezıdentimizdiń óńirimizde atqarylyp jatqan jumystarǵa bergen oń baǵasy dep bilemiz», - dedi N.Nálibaev.
Memleket basshysynyń, Úkimettiń erekshe qoldaýymen Syr óńiri baıypty bastamalardyń, jasampaz jobalardyń ordasyna aınaldy. Óńir barlyq negizgi makroekonomıkalyq kórsetkishter boıynsha respýblıkada aldyńǵy qatarda. Oblys bıýdjeti 750 mlrd teńgeden asty. Osydan úsh jyl buryn 364 mlrd teńge bolatyn. Birlesken jumystyń nátıjesinde ósim 206 paıyzdy qurady. Bul aýqymdy qarajat eń ózekti degen máselelerdi sheshýge, turǵyndardyń ómir súrý sapasyn jaqsartýǵa jáne aýqymdy ınfraqurylymdyq jobalardy iske asyrýǵa baǵyttaldy. Memleket basshysynyń tikeleı qoldaýymen Qyzylorda qalasynda 215 mlrd. teńgege qýattylyǵy 240 megavattyq jańa jylý-elektr ortalyǵy salynýda. Búginde ınvestor «Aksa Enerdjı» túrik kompanııasy qurylysqa 137 mlrd. teńgeden astam ınvestıııa quıyp, jumystyń 70 paıyzdan astamyn aıaqtady. Qyrkúıek aıynda aımaq úshin erekshe mańyzy bar nysan el ıgiligine beriledi. Prezıdent tapsyrmasyna sáıkes, ońtústik óńirlerde elektr energııasynyń tapshylyǵyn boldyrmaý maqsatynda Katarda ótken úkimetaralyq kelisim sheńberinde qýattylyǵy 1100 MVt, quny 892 mlrd teńge bolatyn bý-gaz qondyrǵysyn salý kelisildi. Megajoba 2028 jyly tolyǵymen iske qosylady dep josparlanýda.
Jıynda QR Prezıdentiniń keńesshisi Málik Nurjanuly sóz sóıledi. Qazaqstannyń Eńbek Eri Abzal Eralıev, Qazaqstannyń eńbek sińirgen qaıratkeri, Ulttyq ǵylym akademııasynyń akademıgi, Ulttyq quryltaı múshesi Qylyshbaı Bısenov, Qorqyt ata atyndaǵy Qyzylorda ýnıversıtetiniń rektory Beıbitkúl Kárimova, kópbeıindi qalalyq aýrýhananyń bas dárigeri Nýrıdın Amıtov, «Anaǵa taǵzym» ortalyǵynyń dırektory Altynaı Moljanova pikir bildirdi.
