Túrkistanda Ulttyq quryltaı ótip jatyr. Memleket basshysy quryldaıdyń el basyna qater tóngen kezde shaqyrylatynyn aıtyp, elimizdegi qaıǵyly oqıǵany eske aldy, dep habarlaıdy "Adyrna" ulttyq portaly.
Toqaev quryltaıdyń tarıhı tolǵaqtarda, qıyn-qystaý kezde shaqyrylatynyn aıtyp, arqany keńge salatyn kez emes ekenin eskertti.
«Sóz basynda birden atap óteıin, menińshe, Ulttyq quryltaı bul – arqany keńge salyp otyratyn jıyn emes. Sán-saltanatpen ótkizetin toı da emes. Babalarymyz mańyzdy sheshim qabyldar kezde nemese elge qater tóngen syn saǵatta quryltaı shaqyrǵan, - dedi Qasym-Jomart Toqaev.
Sonymen qatar, prezıdent Abaı oblysyndaǵy alapat órtti aıtyp, qaıǵyly jaǵdaıdy eske aldy.
- Búgingi quryltaıdyń otyrysy elimizdegi qaıǵyly oqıǵadan keıin ótip jatyr. Abaı oblysynda alapat órt shyǵyp, azamattarymyz qaza tapty. Taǵy da qaıtalap aıtqym keledi: biz mundaı oqıǵadan sabaq alýymyz kerek, naqty sheshimder qabyldaýymyz qajet.
El basyna túsken qıyndyqtar, eń aldymen, bizdiń bereke-birligimizdi synǵa salady. Osyndaı kúrdeli sátter, eń bastysy – shynaıy janashyrlyq jáne tereń jaýapkershilik tanytý qajet ekenin aıqyn kórsetedi. Muny ózderińiz óte jaqsy túsinip otyrsyzdar», - dedi prezıdent.
"Adyrna" ulttyq portaly
