Öskemen qalasynyŋ būrynǧy äkımı Jaqsylyq Omar Şyǧys Qazaqstan oblysy äkımınıŋ bırınşı orynbasary bolyp taǧaiyndaldy. Būl turaly bügın, 7 säuırde öŋır basşysy Nūrymbet Saqtaǧanov aitty, dep habarlaidy «Adyrna» tılşısı.
«Bügın Jaqsylyq Omardy özımnıŋ bırınşı orynbasarym etıp taǧaiyndadym. Jaqsylyq Mūqaşūlynyŋ memlekettık qyzmette ülken täjıribesı bar. Ol 6 jyl boiy oblys ortalyǧynyŋ äkımı boldy. Oǧan öŋırdıŋ barlyq mäselesı men tūrǧynynyŋ mūŋ-mūqtajy jaqsy tanys. Onyŋ jaŋa ärı jauapty qyzmetke bılımın, küş-jıgerın barynşa jūmsaitynyna senımdımın»,—dedı äkım.
Aita keteiık, Jaqsylyq Omar jaŋa qyzmetke taǧaiyndalǧanǧa deiın Şyǧys Qazaqstan oblysy äkımınıŋ keŋesşısı qyzmetın atqarǧan bolatyn. Al 2018-2024 jyldar aralyǧynda Öskemen qalasynyŋ äkımı boldy.
