AQSh senatynyń 50 múshesinen quralǵan top Reseı Ýkraınadaǵy beıbit kelisimnen bas tartqan jaǵdaıda, oǵan qarsy jańa sankııalar engizýdi kózdeıtin zań jobasyn usyndy, ep habarlaıdy "Adyrna" ulttyq portaly DW-ge silteme jasap.
Bul týraly 1 sáýir kúni, respýblıkalyq senator Lındsı Grem men demokrat senator Rıchard Blıýmentaldiń saıttarynda jarııalanǵan baspasóz habarlamasynda aıtylǵan.
"Bul sankııalar Reseı Ýkraınamen turaqty beıbitshilik ornatý týraly adal kelissózder júrgizýden bas tartsa nemese beıbit kelisim jasalǵannan keıin Ýkraına egemendigine qaýip tóndiretin áskerı basqynshylyq sııaqty ózge de áreketterge barsa engiziledi. Sondaı-aq, zań jobasy Reseıdiń munaıyn, gazyn, ýranyn jáne basqa da ónimderin satyp alatyn elderden ımporttalatyn taýarlarǵa 500% mólsherinde baj salyǵyn engizýdi kózdeıdi", – delingen habarlamada.
"Senatta Reseı – basqynshy memleket degen kózqaras basym. Bul sumdyq soǵysty jáne Pýtınniń agressııasyn dál qazir toqtatý qajet. Sonymen qatar, bolashaqta da mundaı áreketterge jol bermeý kerek. Biz Reseımen beıbitshilik ornatý máselesinde prezıdent Tramptyń kóńili qalǵanyn túsinemiz jáne onyń turaqty, ádil ári laıyqty beıbitshilik ornatý jónindegi umtylysyn qoldaımyz" – dep málimdedi Grem men Blıýmental.
"2025 jyly prezıdent Tramp pen onyń komandasy búkil álemniń qolynan kelmegen nárseni iske asyryp, Reseıdiń Ýkraınaǵa qarsy agressııasyn túbegeıli toqtatady jáne erkin, demokratııalyq Ýkraınanyń ómirsheńdigin qamtamasyz etedi dep úmittenemiz", – dep túıindedi senatorlar.
Qujatqa sáıkes, bul zań jobasynyń avtorlary – 25 respýblıkashyl, 24 demokrat jáne bir táýelsiz senator. Sonymen qatar, zań jobasyn ókilder palatasyna engizýge tórt kongressmen (eki respýblıkashyl jáne eki demokrat) kelisken.
Grem men Blıýmental jańa sankııalardy AQSh Kongresiniń qos palatasy qoldaıtynyna senimdi. Bul sankııalar daıyn jáne senat pen ókilder palatasynda eki partııanyń da basym qoldaýyna ıe boldy.
Buǵan deıin Grem men Blıýmental Reseıge qatysty birneshe birlesken zań jobasyn usynǵan. 2022 jylǵy qyrkúıekte jáne 2024 jylǵy maýsymda olar Reseıdi terrorızmdi demeýshi memleket dep tanýdy usyndy. Al 2025 jylǵy naýryzda olar Reseıdiń 300 mıllıard dollardan astam muzdatylǵan aktıvterin tárkilep, Ýkraınanyń paıdasyna berýdi talap etti. Alaıda bul bastamalardyń eshqaısysy qabyldanbady.
