Búgin Almaty qalasynyń áýejaıynda myńdaǵan jankúıer Parıj Olımpıadasynyń chempıony Eldos Smetov pen Olımpıadanyń qola júldegeri Ǵusman Qyrǵyzbaevty qarsy aldy, dep habarlaıdy “Adyrna” ulttyq portaly.
Franııadan Almatyǵa taban tiregen dzıýdoshylardy áýejaıdan jankúıerleri, týystary, dostary jáne BAQ ókilderi ystyq yqylaspen qarsy aldy.
Parıj tórinde kók baıraǵymyzdy kókte jelbiretip, el abyroıyn asqaqtatyp, dzıýdo sportynan Qazaqstannan shyqqan tuńǵysh Olımpıada chempıony ataǵyn jeńip alǵan Eldos Smetov, qola medal ıelengen Ǵusman Qyrǵyzbaev syndy sańlaqtarmen qatar, dzıýdodan óner kórsetken Qazaqstan quramasy men bapkerler jankúıerler aldynan júrip ótti.
Eske salaıyq, Eldos Smetov sońǵy úsh Olımpıada oıyndaryna qatysyp, bárinen oljaly oraldy. 2016 jyly Rıoda kúmis júlde jeńip alsa, Tokıo Olımpıadasyn qola júldemen aıaqtady. Osy joly altynyn moınyna taqty.
Parıj Olımpıada oıyndarynda qola medal ıegeri atanǵan tatamı sheberi Ǵusman Qyrǵyzbaev qazaqstandyqtarǵa qoldaý kórsetkenderi úshin alǵysyn bildirdi.
«Almaty áýejaıyndaǵy atmosfera tamasha. Qazaq eline rahmet. Altyn alam dep barǵanmyn. Buıyrǵany qola boldy. Bar kúsh -jigerimdi saldym. Biraq qola aldym. Bári keremeti boldy»,- dedi Ǵusman Qyrǵyzbaev.
Aıta ketsek, Ǵusman Qyrǵyzbaev – 2021 jylǵy álem chempıonatynyń kúmis júldegeri, 2019 jáne 2022 jyldary ótken Azııa birinshilikteriniń qola medal ıegeri.
