Qostanaıda óz erkimen oqýdan shyqqan burynǵy kýrsant oqý ornyna 2 728 525 teńge qaıtarmaý úshin sotqa aryzdandy, dep habarlaıdy "Adyrna" ulttyq portaly.
Qostanaı qalalyq sotynda qaralǵan is materıaldaryna sáıkes, kýrsant oqý ornyn óz qalaýymen tastap, ishki ister organynan bosatylǵan. Alaıda, oǵan memleket tólegen oqý shyǵyndaryn qaıtarý týraly habarlama jiberilgen.
Sot barysynda talapker kelisimshart jasasý kezinde oqý orny jalpy oqý aqysy týraly aqparatty jasyrǵanyn alǵa tartty. Alaıda sot kelisimshartqa sáıkes, kýrsanttyń oqýdy bitirgen soń keminde 5 jyl ishki ister organynda qyzmet etýge mindetti ekenin anyqtady. Eger oqýdan óz erkimen shyqsa, memleket jumsaǵan shyǵyndy óteýi tıis.
Kýrsantqa oqý barysynda aı saıyn 367 066 teńge kóleminde qarjy bólingen. Oǵan oqý aqysy, stıpendııa, tamaqtaný, kıim-keshek jáne jol shyǵyndary kirgen. Talapker barlyq sharttarǵa jeke ózi qol qoıǵan.
Nátıjesinde sot burynǵy kýrsanttyń talabyn qanaǵattandyrýdan bas tartty. Qazirgi tańda sot sheshimi zańdy kúshine engen joq.
