Úsh jyl buryn Qostanaı qalasynda «Qonaı» degen ataýmen jańa shaǵyn aýdannyń qurylysy bastalǵan edi. Sodan beri búginge deıin 5 qabatty 19 úı salynǵan. Alaıda úıdiń jaǵdaıy máz emes. Áleýmettik jelilerde jańa salynǵan, biraq paıdalanýǵa berilmegen páterdiń sýretteri tarap ketti, dep habardaıdy “Adyrna” ulttyq portaly.
Sýretterde bólmeniń qaq ortasynda edennen tóbege deıin muz qatyp tur.
Qostanaı ákimdigi osy jaǵdaıdy túsindirdi.
"Qonaı shaǵyn aýdanyndaǵy 21 oram № 2, 3 úıleriniń qurylysyn "Maral Qurylys" JShS merdiger uıymy salyp jatyr. Qazan aıynda bul uıymmen shart buzyldy, sebebi olar óz mindetterin oryndamady, memlekettik satyp alýda jaýapsyz qatysýshy dep tanyldy. Jasalǵan shartqa sáıkes, qurylysty aıaqtaý úshin jańa merdiger uıymdy anyqtaý kezeńinde úıdi "Nur Saqshy" kúzet fırmasy kúzetip jatyr. Úıdi tekserý kezinde jylý tek jertólede qosylǵany anyqtaldy. Jylytý júıesindegi Maevsk kranynan sý aqqan", - dedi ákimdikten.
Anyqtalǵandaı, qalalyq qurylys bólimi 13 jeltoqsanda osy jumystardy aıaqtaıdy.
"Osy oqıǵa týraly ýaqtyly habarlamaǵan kúzet uıymyna tıisti hat joldandy. Qazirgi ýaqytta atalǵan úılerdiń qurylysy boıynsha jumystardy aıaqtaýǵa memlekettik satyp alý jarııalandy, merdiger uıym anyqtalǵannan keıin turǵyndardy qonystandyrǵanǵa deıingi barlyq aqaýlar joıylady", - dep atap ótti qalalyq ákimdikte.
