Respýblıkalyq partııa ókili Klaýdııa Tennı AQSh-tyń prezıdenti Donald Tramptyń týǵan kúni – 14 maýsymdy memlekettik mereke retinde belgileýdi usyndy, dep habarlaıdy "Adyrna" ulttyq portaly The Guardian-ǵa silteme jasap.
Ol bul kúndi AQSh týy kúnimen biriktirýdi jón sanaıdy.
Bul bastamanyń Kongreste qoldaý tabýy ekitalaı, degenmen sarapshylar ony Tramptyń senimine ıe bolý maqsatynda jasalǵan qadam dep baǵalaýda.
Nıý-Iork shtatyndaǵy Fınger-Leıks aımaǵynyń ókili Klaýdııa Tennı Trampty "zamanaýı Amerıka tarıhyndaǵy eń mańyzdy tulǵa" dep atady. Onyń pikirinshe, Tramptyń týǵan kúni Djordj Vashıngtonnyń týǵan kúni sekildi federaldy mereke mártebesine laıyq.
Alaıda bul usynys áleýmettik jelilerde qyzý talqylanyp, synǵa ushyrady. X (burynǵy Twitter) qoldanýshylary "Bul azyq-túlik baǵasyn tómendetedi dep oılaısyz ba?" nemese "Óz saılaýshylaryńyz úshin mańyzdy istermen aınalysyńyz!" degen pikirler qaldyrǵan.
Bul bastama respýblıkashyldar baqylaýyndaǵy Kongreste qoldaý tabýy múmkin. Alaıda, zańnyń qabyldanýy úshin demokrattardyń da daýysy qajet bolady.
Aıta keteıik, buǵan deıin kongressmen Eddıson Makdaýell Vashıngtondaǵy halyqaralyq áýejaıdyń ataýyn Tramptyń qurmetine ózgertý týraly usynys jasasa, Anna Paýlına Lýna Tramptyń beınesin Rashmor taýyna qashaý ıdeıasyn kótergen bolatyn.
