Foto: Elements.envato.com
Euroodaq keŋesı Reseige qarsy auqymdy 20-sanksiialyq pakettı bekıttı. Jaŋa tızımge Qazaqstanmen bailanysty bırqatar kompaniialar men jeke tūlǧalar da endı, dep habarlaidy "Adyrna" ūlttyq portaly vlast.kz saityna sıltep.
Sanksiialyq tızımge jalpy sany 120 adam men ūiym qosylǧan. Olardyŋ qatarynda Qazaqstan, Qytai, BAÄ, Özbekstan jäne Belarusten 16 kompaniia bar.
Atap aitqanda, tızımge nemıstıŋ UrSeCo Handels GmbH & Co. KG kompaniiasynyŋ aksionerı Aleksandr Jdanov engızıldı. Būl kompaniia Wacker Chemie AG öndıretın joǧary tazartylǧan hlorly sutegın jetkızumen ainalysady. Atalǧan önım jartylai ötkızgış plastinalardy öŋdeu üşın asa maŋyzdy himiialyq zat sanalady. Sonymen qatar tızımge Qazaqstandaǧy «Bırıkken sauda toby» JŞS jäne onyŋ qūryltaişysy Älımjan Bekov engızılgen. Qūjatta «Bırıkken sauda toby» joǧary tazartylǧan hlorly sutegın Reseidıŋ «Siltron» JŞQ-na jetkızgenı körsetılgen. Būl kompaniianyŋ basym ülesı Jdanovtyŋ äkesıne tiesılı. Jetkızu tızbegı Polşa, Türkiia jäne Qazaqstan arqyly ötkenı aitylǧan.
Jaŋa sanksiialar Resei käsıporyndaryna joǧary tazartylǧan hlorly sutegın eksporttauǧa tyiym salady.
Sanksiialyq tızımge reseilık käsıpkerler Dmitrii Maliuta men Denis Şişkin de endı. Olar «Bina İnvest» JŞQ arqyly Qazaqstan men Özbekstannan maqta selliulozasyn importtaityn kompaniialardy baqylaidy. Būl materialdar Reseidıŋ oq-därı zauyttarynda jäne äskeri önım öndırısınde qoldanylady.
Jalpy alǧanda, jaŋa paket Reseidıŋ mūnai eksportynan tüsetın tabysty azaituǧa baǧyttalǧan. Qūjatta köleŋkelı mūnai sektorynda jūmys ısteitın kompaniialarǧa, sonyŋ ışınde üşınşı elderdegı ūiymdarǧa jäne ırı teŋız saqtandyruşysyna şekteu qoiylatyny körsetılgen. Odan bölek, Reseidıŋ «köleŋkelı flotynyŋ» qūramyna kıretın 46 keme sanksiiaǧa ılıktı.
Euroodaq 20 reseilık bankpen operasiia jürgızuge tyiym saldy. Sonymen qatar sanksiialardy ainalyp öttı nemese Reseidıŋ qarjylyq habar almasu jüiesımen (SPFS) bailanysty degen küdıkke ılıngen üşınşı elderdegı tört qarjy ūiymyna şekteu qoiyldy. Būl qatarda Qyrǧyzstandaǧy «Keremet Bank» pen «Kapital Bank» bar. Europalyq kompaniialar men bankter olarǧa gumanitarlyq tölemderden basqa operasiia jürgıze almaidy.
Būdan bölek, Qyrǧyzstandaǧy «TengriKoin» JAQ ta sanksiialyq tızımge engızıldı. Ol A7A5 steiblkoinın saudalaityn «Meer» platformasyn basqarady. Euroodaq mälımetınşe, būl ūiym Resei ükımetıne qoldau körsetıp, paida köredı.
Sanksiialar Qyrǧyzstanǧa sandyq baǧdarlamamen basqarylatyn stanoktar men radio jabdyqtaryn eksporttauǧa da tyiym salady. Euroodaq būl şeşımdı Qyrǧyzstan arqyly Reseige qaita eksport kölemınıŋ ösuımen tüsındırdı.
Jaŋa paket äskeri önım öndıretın 58 kompaniia men olarǧa qatysy bar tūlǧalardy qamtidy. Sondai-aq Reseidıŋ qorǧanys sektoryna tehnologiialyq tūrǧyda qoldau körsetetın 60 käsıporynǧa qatysty eksporttyq şekteuler küşeitıledı.
Eske salsaq, būǧan deiın Euroodaqtyŋ 16-sanksiialyq paketıne qazaqstandyq «Kazstanex» jäne «MetallStan» JŞS-lary engen bolatyn. Euroodaq būl ūiymdar Reseidıŋ äskeri-tehnikalyq äleuetın arttyruǧa üles qosady dep mälımdegen.
