Túrikmenstan prezıdenti Serdar Berdimuhamedov birqatar sheneýnikti qyzmetinen bosatty, dep habarlaıdy "Adyrna" ulttyq portaly.
Ferǵana agenttiginiń málimetinshe, 7 aqpanda ótken úkimettiń keńeıtilgen otyrysynda Túrikmenstan prezıdenti Serdar Berdimuhamedov birqatar joǵary laýazymdy tulǵany qyzmetinen bosatty.
Mınıstrler kabınetiniń múshesi, eldiń ekonomıka jáne qarjy mınıstri Serdar Djoraev 2024 jyly atqarylǵan jumystar týraly esep bergennen keıin qyzmetinen bosatyldy. Ol memlekettik bıýdjettiń kiris bóligi 105,9%-ǵa, shyǵys bóligi 99,9%-ǵa oryndalǵanyn málimdegen edi. Prezıdent onyń ornyna mınıstrdiń orynbasary Mammetǵuly Astanǵulovty taǵaıyndady.
Mádenıet jáne buqaralyq aqparat quraldary jónindegi vıe-premer Mıahrıdjemal Mammedova da qyzmetinen bosatyldy. Ol Mahtýmquly Fragı aqynnyń 300 jyldyǵyna arnalǵan is-sharalar, shyǵarmashylyq konkýrstar men mádenı jobalar týraly baıandaǵan. Biraq prezıdent onyń jumysyna qanaǵattanbaǵanyn bildirip, ornyna Bahar Seıidovany taǵaıyndady.
Ahal ýálaıatynyń ákimi Soltanmyrat Soltanmyradov ta qyzmetinen aıyryldy. Onyń ornyna Toıǵuly Nurmuradov taǵaıyndaldy.
Prezıdenttiń aıtýynsha, 2024 jyly eldiń jalpy ishki ónimi 6,3%-ǵa ósti. Ónerkásip 1,5%-ǵa, qurylys salasy 11%-ǵa, kólik jáne baılanys salasy 7,2%-ǵa, saýda 10,1%-ǵa, qyzmet kórsetý salasy 8,6%-ǵa artty. Sonymen qatar, jalaqy 10,6%-ǵa ósip, zeınetaqy men járdemaqylar ýaqytynda tólengen.
2025 jyly Túrikmenstanda 500 myń sharshy metr turǵyn úı, 4620 oryndyq mektepter jáne 2000 oryndyq balabaqshalar salý josparlanyp otyr. Sondaı-aq, birneshe halyqaralyq is-sharalar ótkiziledi.
Prezıdent Serdar Berdimuhamedov eldiń ári qaraıǵy damýyna senim bildirip, halyqtyń eńbegi men birliginiń arqasynda jańa jetistikterge jetetinin atap ótti.
