Prezıdent Toqaev belgili ǵalym, abaıtanýshy Mekemtas Myrzahmetulynyń otbasy men jaqyn týystaryna kóńil aıtý jedelhatyn joldady, dep habarlaıdy "Adyrna" ulttyq portaly.
Bul týraly Aqorda habarlady.
Qasym-Jomart Toqaev kórnekti abaıtanýshy ǵalym, fılologııa ǵylymdarynyń doktory, I dárejeli "Barys" ordeniniń ıegeri Mekemtas Myrzahmetulynyń dúnıeden ótýine baılanysty onyń otbasy men jaqyn týystaryna kóńil aıtty.
"Mekemtas Myrzahmetuly bar salıqaly ǵumyryn Abaı murasyn zerdeleýge, otandyq ádebıettaný ǵylymynyń keregesin keńeıtýge arnaǵan zııaly tulǵa edi. Ult rýhanııatynyń ilgeri basýyna súbeli úles qosyp, kóptegen shákirt tárbıeledi. Uzaq jylǵy qajyrly izdenisterinen týǵan qundy eńbekteri laıyqty baǵaǵa ıe boldy. Ǵıbratty ǵumyr keship, sońyna ónegeli iz qaldyrǵan Mekemtas Myrzahmetulynyń aıaýly esimi halqymyzdyń jadynda saqtalady. Marqumnyń ımany salamat, jany jánnatta bolsyn", - dep jazylǵan jedelhatta.
