تۇرىكمەنستان پرەزيدەنتى سەردار بەردىمۇحامەدوۆ بىرقاتار شەنەۋنىكتى قىزمەتىنەن بوساتتى، دەپ حابارلايدى "ادىرنا" ۇلتتىق پورتالى.
فەرعانا اگەنتتىگىنىڭ مالىمەتىنشە، 7 اقپاندا وتكەن ۇكىمەتتىڭ كەڭەيتىلگەن وتىرىسىندا تۇرىكمەنستان پرەزيدەنتى سەردار بەردىمۇحامەدوۆ بىرقاتار جوعارى لاۋازىمدى تۇلعانى قىزمەتىنەن بوساتتى.
مينيسترلەر كابينەتىنىڭ مۇشەسى، ەلدىڭ ەكونوميكا جانە قارجى ءمينيسترى سەردار دجوراەۆ 2024 جىلى اتقارىلعان جۇمىستار تۋرالى ەسەپ بەرگەننەن كەيىن قىزمەتىنەن بوساتىلدى. ول مەملەكەتتىك بيۋدجەتتىڭ كىرىس بولىگى 105,9%-عا، شىعىس بولىگى 99,9%-عا ورىندالعانىن مالىمدەگەن ەدى. پرەزيدەنت ونىڭ ورنىنا ءمينيستردىڭ ورىنباسارى ماممەتعۇلى استانعۇلوۆتى تاعايىندادى.
مادەنيەت جانە بۇقارالىق اقپارات قۇرالدارى جونىندەگى ۆيتسە-پرەمەر مياحريدجەمال ماممەدوۆا دا قىزمەتىنەن بوساتىلدى. ول ماحتۋمقۇلى فراگي اقىننىڭ 300 جىلدىعىنا ارنالعان ءىس-شارالار، شىعارماشىلىق كونكۋرستار مەن مادەني جوبالار تۋرالى بايانداعان. بىراق پرەزيدەنت ونىڭ جۇمىسىنا قاناعاتتانباعانىن ءبىلدىرىپ، ورنىنا باحار سەيىدوۆانى تاعايىندادى.
احال ءۋالاياتىنىڭ اكىمى سولتانمىرات سولتانمىرادوۆ تا قىزمەتىنەن ايىرىلدى. ونىڭ ورنىنا تويعۇلى نۇرمۇرادوۆ تاعايىندالدى.
پرەزيدەنتتىڭ ايتۋىنشا، 2024 جىلى ەلدىڭ جالپى ىشكى ءونىمى 6,3%-عا ءوستى. ونەركاسىپ 1,5%-عا، قۇرىلىس سالاسى 11%-عا، كولىك جانە بايلانىس سالاسى 7,2%-عا، ساۋدا 10,1%-عا، قىزمەت كورسەتۋ سالاسى 8,6%-عا ارتتى. سونىمەن قاتار، جالاقى 10,6%-عا ءوسىپ، زەينەتاقى مەن جاردەماقىلار ۋاقىتىندا تولەنگەن.
2025 جىلى تۇرىكمەنستاندا 500 مىڭ شارشى مەتر تۇرعىن ءۇي، 4620 ورىندىق مەكتەپتەر جانە 2000 ورىندىق بالاباقشالار سالۋ جوسپارلانىپ وتىر. سونداي-اق، بىرنەشە حالىقارالىق ءىس-شارالار وتكىزىلەدى.
پرەزيدەنت سەردار بەردىمۇحامەدوۆ ەلدىڭ ءارى قارايعى دامۋىنا سەنىم ءبىلدىرىپ، حالىقتىڭ ەڭبەگى مەن بىرلىگىنىڭ ارقاسىندا جاڭا جەتىستىكتەرگە جەتەتىنىن اتاپ ءوتتى.
