Almatyda qoǧamdyq keŋıstıkterdı damytuǧa baǧyttalǧan keşendı baǧdarlama aiasyndaǧy jūmystar jalǧasuda. Biylǧy alǧaşqy jartyjyldyqtyŋ qorytyndysy boiynşa toǧyz nysandaǧy negızgı körkeitu jūmystary aiaqtaldy. Sonymen qatar, qalanyŋ ırı aumaqtaryn körıktendıru jalǧasyp, jaŋa jobalar ıske asyryla bastady. Būl turaly Almaty qalasynyŋ Qoǧamdyq keŋıstıkterdı damytu basqarmasynyŋ ökılderı habarlady.
Qazırgı taŋda Dostyq daŋǧyly, Puşkin köşesı, Sairan kölınıŋ jaǧalauy, Geologtar alleiasy, «Oŋtüstık» saiabaǧy, Baum toǧaiy, FLOW PARK, Respublika alaŋy jäne «Atakent» Iskerlık yntymaqtastyq ortalyǧy aldyndaǧy alaŋ paidalanuǧa daiyndaldy. Qazır būl nysandarda soŋǧy ärleu jäne tüzetu jūmystary jürgızılude.
Körkeitu barysynda jürgınşıler aimaqtary jaŋartylyp, syrtqy jaryqtandyru jüielerı men avtomatty suaru jüielerı ornatyldy. Sondai-aq kögaldandyru jūmystary jürgızılıp, şaǧyn säulettık nysandar, balalar jäne sport alaŋdary, zamanaui demalys aimaqtary salyndy. Nysandardyŋ tehnikalyq daiyndyǧy tūrǧyndardyŋ olardy qazırdıŋ özınde seruendeu jäne demalu üşın paidalanuyna mümkındık beredı.
Sonymen qatar, körkeitu baǧdarlamasynyŋ kelesı kezeŋderı de jalǧasuda. 2026 jyldyŋ soŋyna deiın Tūŋǧyş Prezident saiabaǧyn qaita jaŋǧyrtu, sondai-aq Timiriazev, Mäsanchi, Seifullin, Jarokov, Jandosov, Rozybakiev, Sätbaev köşelerı men Abai daŋǧylyn körkeitu josparlanǧan. Al N. Sas atyndaǧy bplalar men jasöspırımder teatry maŋyndaǧy skverdı körıktendıru jūmystary tamyz aiynyŋ soŋyna deiın aiaqtalmaq.
Būdan bölek, balalarǧa arnalǧan Ǧylym muzeiınıŋ qūrylysy jürıp jatyr. Nysandy biylǧy jyldyŋ soŋyna deiın paidalanuǧa beru josparlanǧan.
Qalada qoǧamdyq keŋıstıkterdı damytuǧa arnalǧan jaŋa jobalar da bastau aldy. Sonyŋ bırı Äuejai kölı aumaǧyn qaita jaŋǧyrtu. Būl jerde tūrǧyndarǧa arnalǧan zamanaui demalys aimaǧyn qūru közdelgen. Jaŋa jobalar qalalyq ortanyŋ sapasyn arttyruǧa, demalys infraqūrylymyn damytuǧa jäne jaily qoǧamdyq keŋıstıkter qalyptastyruǧa baǧyttalǧan.
Qoǧamdyq keŋıstıkterdı damytu basqarmasynyŋ mälımetınşe, barlyq nysanda qūrylys-montaj jūmystarynyŋ barysyna, tartylǧan tehnika men jūmysşylar sanyna kün saiyn baqylau jürgızıledı. Būl jobalardyŋ belgılengen merzımde aiaqtaluyn qamtamasyz etuge mümkındık beredı.
