Esırtkı qoldandy jäne esırtkı ūiasyn ūiymdastyrdy degen aiyppen qamauǧa alynǧan qyzmetker aiypty joqqa şyǧardy, dep habarlaidy “Adyrna” ūlttyq portaly QazTAG-qa sıltep.
10 täulıkke äkımşılık qamauǧa alynǧan dıni qyzmetker İakov Voronsovtyŋ qoljazba hatyn onyŋ advokaty Dias Ahmetov jariialaǧan.
Qorǧauşynyŋ aituynşa, hat Almatydaǧy äkımşılık qamauǧa alynǧandardy ūstau izoliatorynda kezdesuden keiın, qyzmetkerdıŋ ötınışımen taratylǧan.
Hat mätınınde Voronsov qylmystyq qudalaudy özınıŋ Qazaqstanda täuelsız pravoslav şırkeuın qūru äreketımen bailanystyrady.
Onyŋ sözınşe, soŋǧy uaqytta özıne qatysty baqylau jürgızılgen, qysym körsetılgen jäne aşyq türde jazalau turaly ündeuler bolǧan.
«Menıŋ üiımde eşqandai priton bolǧan emes. Üiımnen tabylǧan ūntaq maǧan tiesılı emes. Ony ädeiı äkelgen dep esepteimın. Sot saraptamanyŋ qate qorytyndysyna süienıp şeşım şyǧardy», – delıngen hatta.
Voronsov sot şeşımımen kelıspeitının jäne alda özıne qatysty «jalǧan ūiymdastyrylǧan qylmystyq tergeu» boluy mümkın ekenın jazǧan.
Aita ketsek, dın qyzmetkerı 2022 jyldyŋ aqpan aiynda Reseidıŋ Ukrainadaǧy soǧysqa qarsy ūstanymyn aşyq bıldırıp, Ukrainadaǧy beibıtşılıkke şaqyrǧan aşyq hatqa qol qoiǧan şamamen 292 pravoslavie dın qyzmetkerınıŋ qataryna qosylǧannan keiın tanymal boldy.
2023 jyly ol qyzmetınen şettetıldı, al 2024 jyly dın qyzmetkerı märtebesınen aiyrylǧan edı.
Sondai-aq 2024 jyly Voronsovqa qatysty Qylmystyq kodekstıŋ 141-baby («Ūltaralyq arazdyqty qozdyru») boiynşa qylmystyq ıs qozǧalǧan, alaida keiınnen qylmys qūramy bolmaǧandyqtan tergeu toqtatyldy.
Būǧan deiın Almaty qalasynyŋ mamandandyrylǧan audanaralyq äkımşılık soty būrynǧy dıni qyzmetker İakov Voronsovtyŋ qalalyq ädılet departamentı men Qazaqstannyŋ Ädılet ministrlıgıne qarsy bergen talap-aryzyn öndırıske qabyldaǧanyn habarladyq.
Bırneşe jyl būryn Voronsov Qazaqstanda Orys pravoslav şırkeuınıŋ Mäskeu patriarhatyna baǧynbaityn derbes pravoslav şırkeuın qūruǧa ärekettengen. Ol Ädılet ministrlıgıne ekı ret qūjat tapsyrǧanymen, ol qūrmaq bolǧan prihod tırkeuden ötpedı..
