3 aqpan kúni Oral irgesindegi 12 myńdaı adam turatyn «Qus fabrıkasy» saıajaıynyń halqy elektr jaryǵynyń ajyratylýyna, onyń tólemderiniń rettelmegenine narazylyq tanytyp, joldy jaýyp tastady. Bul týraly sarapshy.info basylymy jazdy, dep habarlaıdy “Adyrna” ulttyq portaly.
Atalǵan qaýymdastyqtyq qazirgi tóraǵasy Ashat Ánesuly áli «Batys Qazaqstan aımaqtyq elektr jelilik kompanııasy» JShS kompanııasymen kelisimshartqa otyryp úlgermegen.
– Qazirgi halyqtyń kóterilip jatqan sebebi – REK-ke («Batys Qazaqstan aımaqtyq elektr jelilik kompanııasy» JShS) osy aýdan turǵyndarynyń jaryqqa berejaq bolǵany. Maǵan deıingi taǵaıyndaǵan tóraǵa Asylbek Qabesov aqshany REK-ke tólemeı kelgen. Qazirgi kezde 71 mln bolǵan. Olar keldi de jaryqty óshirip tastady. Al men aqshany tólep úlgergen joqpyn. Maǵan tóle dep jatyr. Meni áli REK-pen kelisimshartqa otyrǵan joqpyn, - deıdi ol.
Dál qazir aýdan turǵyndarynyń «Batys Qazaqstan aımaqtyq elektr jelilik kompanııasy» JShS-yna qaryz mólsheri 71 mln teńgege jetken. Sol sebepti tańerteńgi saǵat 11:00-den bastap aýdannyń jaryǵyn óshirip tastaǵan. Shamamen bul aýdanda eki myń eki júzden astam úı bar.
Baý-baqsha seriktestigi bolyp sanalǵandyqtan munda 1 kVt/saǵ elektr energııasynyń quny qazirgi ýaqytta 1 kVt úshin 32,60 teńge. Al Oral qalasy boıynsha ortasha tarıf — 28,16 teńge.
Qystyń kúni jaryq pen jylýdyń óshkenine narazy halyq jınalyp, shaǵymdaryn bildirýde.
Turǵyndardyń aıtýynsha, osy ýaqytqa deıin elektr energııasynyń aqshasyn aýdannyń burynǵy tóraǵasy Asylbek Qabesovtyń Kaspi nómirine aýdaryp otyrǵan. Keı jaǵdaıda seriktestik tóraǵasy otyrǵan keńsege baryp, qolma-qol tólep júrgen.
