Ózbekstan 5 aqpannan bastap Qazaqstanmen shekaradaǵy iri "Gıshtkýprık" (Qazaqstan jaǵynda "Jıbek Joly" baqylaý ótkizý pýnkti) keden beketin tórt aıǵa jabady, dep habarlaıdy "Adyrna" ulttyq portaly.
Bul týraly Gazeta.uz Ózbekstannyń keden komıtetine silteme jasap habarlady.
Baqylaý ótkizý pýnktinde úsh jyldan astam ýaqyttan beri jóndeý jumystary júrip jatyr. Aldaǵy tórt aıda ol aıaqtalýy kerek.
Aqparatqa qaraǵanda, bekettiń aýmaǵy 1.5 gektarǵa keńeıip, osylaısha ótkizý múmkindigi - 350-den 1000 kólikke deıin, 30 myńnan 50 myń adamǵa deıin ulǵaıtylmaq.
Endi aldaǵy tórt aıda jaıaý júrginshiler men kólikter, avtobýstar jýyrda ashylǵan "Naýaı" beketi arqyly óte alady. Eki beket arasyndaǵy qashyqtyq 20 shaqyrymǵa jýyq.
Degenmen "Naýaı" beketi arqyly júk kólikteriniń ótýine tyıym salynǵan.
