Túrkııadaǵy Bolý qalasyndaǵy Kartalkaıa taý shańǵysy kýrortyndaǵy qonaqúıde bolǵan órtten 76 adam qaza tapty, dep habarlaıdy "Adyrna" ulttyq portaly.
Qazirgi ýaqytta olardyń 52-siniń denesi anyqtaldy.
Órt 12 qabatty aǵash ǵımarattyń tórtinshi qabatynan bastalǵan. Oqıǵa kezinde qonaqúıde 238 adam bolǵan. Keıbir qonaqtar ǵımarattan tereze arqyly sekirip shyqqan. Olardyń ekeýi qaza tapty. Basqalary tósek jaımalary men kórpelerdi baılap, tómen túsýge tyrysqan.
Órt tańerteń bastalyp, 10 saǵattan keıin ǵana sóndirilgen. Órttiń shyǵý sebebi ázirge belgisiz, tergeý jumystary jalǵasýda. Ishki ister mınıstrligi toǵyz adamnyń qamaýǵa alynǵanyn habarlady. Olardyń arasynda qonaqúı ıesi de bar.
Órt saldarynan 22 qańtar Túrkııada jalpyulttyq aza tutý kúni dep jarııalandy.
Úkimet otyrysynan keıin prezıdent Rejep Taıyp Erdoǵan qaza tapqandardyń otbasylaryna kóńil aıtyp, oqıǵaǵa kinálilerdiń laıyqty jazasyn alatynyn aıtty.
«Qaıǵyly oqıǵaǵa qatysy barlar men abaısyzdyqqa jol bergender zań aldynda jaýap beredi. Ádilettilik qatań túrde qamtamasyz etiledi», – dedi prezıdent.
Ulttyq aza tutý belgisi retinde Túrkııanyń barlyq aımaǵynda jáne sheteldegi ókildikterinde týlar tańerteńnen keshke deıin jartylaı túsirildi.
Erdoǵan osy aýyr kezeńde saıasattan bas tartyp, el bolyp birlik tanytýǵa shaqyrdy.
«Qazir saıasattyń emes, birlik pen qoldaýdyń ýaqyty. Barlyǵyn – saıasatkerlerdi, buqaralyq aqparat quraldaryn jáne jergilikti bılikti azamattarymyzdyń qaıǵysyn bólisýge shaqyramyz», – dedi ol.
Prezıdent sonymen qatar mindetterin durys oryndamaǵandarǵa qatysty qatań sharalar qoldanylatynyn eskertti.
