تۇركياداعى بولۋ قالاسىنداعى كارتالكايا تاۋ شاڭعىسى كۋرورتىنداعى قوناقۇيدە بولعان ورتتەن 76 ادام قازا تاپتى، دەپ حابارلايدى "ادىرنا" ۇلتتىق پورتالى.
قازىرگى ۋاقىتتا ولاردىڭ 52-ءسىنىڭ دەنەسى انىقتالدى.
ءورت 12 قاباتتى اعاش عيماراتتىڭ ءتورتىنشى قاباتىنان باستالعان. وقيعا كەزىندە قوناقۇيدە 238 ادام بولعان. كەيبىر قوناقتار عيماراتتان تەرەزە ارقىلى سەكىرىپ شىققان. ولاردىڭ ەكەۋى قازا تاپتى. باسقالارى توسەك جايمالارى مەن كورپەلەردى بايلاپ، تومەن تۇسۋگە تىرىسقان.
ءورت تاڭەرتەڭ باستالىپ، 10 ساعاتتان كەيىن عانا سوندىرىلگەن. ءورتتىڭ شىعۋ سەبەبى ازىرگە بەلگىسىز، تەرگەۋ جۇمىستارى جالعاسۋدا. ىشكى ىستەر مينيسترلىگى توعىز ادامنىڭ قاماۋعا الىنعانىن حابارلادى. ولاردىڭ اراسىندا قوناقۇي يەسى دە بار.
ءورت سالدارىنان 22 قاڭتار تۇركيادا جالپىۇلتتىق ازا تۇتۋ كۇنى دەپ جاريالاندى.
ۇكىمەت وتىرىسىنان كەيىن پرەزيدەنت رەجەپ تايىپ ەردوعان قازا تاپقانداردىڭ وتباسىلارىنا كوڭىل ايتىپ، وقيعاعا كىنالىلەردىڭ لايىقتى جازاسىن الاتىنىن ايتتى.
«قايعىلى وقيعاعا قاتىسى بارلار مەن ابايسىزدىققا جول بەرگەندەر زاڭ الدىندا جاۋاپ بەرەدى. ادىلەتتىلىك قاتاڭ تۇردە قامتاماسىز ەتىلەدى»، – دەدى پرەزيدەنت.
ۇلتتىق ازا تۇتۋ بەلگىسى رەتىندە تۇركيانىڭ بارلىق ايماعىندا جانە شەتەلدەگى وكىلدىكتەرىندە تۋلار تاڭەرتەڭنەن كەشكە دەيىن جارتىلاي ءتۇسىرىلدى.
ەردوعان وسى اۋىر كەزەڭدە ساياساتتان باس تارتىپ، ەل بولىپ بىرلىك تانىتۋعا شاقىردى.
«قازىر ساياساتتىڭ ەمەس، بىرلىك پەن قولداۋدىڭ ۋاقىتى. بارلىعىن – ساياساتكەرلەردى، بۇقارالىق اقپارات قۇرالدارىن جانە جەرگىلىكتى بيلىكتى ازاماتتارىمىزدىڭ قايعىسىن بولىسۋگە شاقىرامىز»، – دەدى ول.
پرەزيدەنت سونىمەن قاتار مىندەتتەرىن دۇرىس ورىنداماعاندارعا قاتىستى قاتاڭ شارالار قولدانىلاتىنىن ەسكەرتتى.
