Abaı oblysyndaǵy alapat órtke baılanysty Qasym-Jomart Toqaev Tótenshe jaǵdaılar mınıstri Iýrıı Ilınge oqıǵa ornyna jedel baryp, órt sóndirý jumystaryn basqarý mindetin júktedi. Bul týraly Aqorda jazdy, dep habarlaıdy «Adyrna» tilshisi.
Úkimetke jáne Abaı oblysynyń ákimdigine qaza tapqan orman sharýashylyǵy qyzmetkerleriniń otbasylaryna barlyq qajet kómekti kórsetý tapsyryldy.
Tótenshe jaǵdaılar mınıstrliginiń málimetinshe, orman sharýashylyǵynyń úsh qyzmetkeri qaza tapty, taǵy 11 qyzmetker izdestirilip jatyr.
Aıta keteıik, qazirgi tańda Abaı oblysynda 6 ýchaskede órtti sóndirý jumystary jalǵasyp jatyr. Tilsiz jaýdy sóndirýge TJM, Orman sharýashylyǵy komıtetinen, jergilikti atqarýshy organdardan jáne Qorǵanys mınıstrliginen 600 astam adam, 168 tehnıka jumyldyrylǵan. Orman sharýashylyǵy komıtetiniń aqparatyna sáıkes, órt aýdany 30 000 gektardy quraıdy.
