Respýblıkalyq «Qansonar» ańshylar qoǵamdyq birlestigi men ańshylyq sharýashylyqtary qaýymdastyǵy qazaq tazy ıt tuqymynyń resmı patent ıelenýshisi atandy, dep habarlaıdy "Adyrna" ulttyq portaly Ulttyq zııatkerlik menshik ınstıtýtynyń baspasóz qyzmetine silteme jasap.
«Qazaq tazysynyń» patent ıelenýshisi – respýblıkalyq «Qansonar» ańshylar qoǵamdyq birlestikteri men ańshylyq sharýashylyqtary qaýymdastyǵy. Jalpy, selekııalyq jetistikke patent jańashyldyq, erekshelik, birtektilik jáne turaqtylyq krıterıılerine sáıkes bolǵan jaǵdaıda beriledi. Selekııalyq jetistikke patentpen qamtamasyz etiletin quqyqtyq qorǵaýdyń kólemi tuqym sıpattamasyna engizilgen belgiler jıyntyǵymen anyqtalady», – delingen habarlamada.
Patent 2021–2023 jyldary Genetıka ınstıtýtymen birlesip júrgizilgen zertteýler negizinde berildi. Qazaq tazysynyń klımattyq júktemelerge joǵary tózimdiligi, júıke júıesiniń erekshe turaqtylyǵy jáne kýrsıng sekildi sporttyq jarystardaǵy erekshe kórsetkishteri anyqtaldy.
«Itterdiń júgiris kezindegi joǵary jumys qabileti men júrisiniń turaqtylyǵy olardyń júıke júıesiniń fýnkıonaldyq jaǵdaıyna tikeleı baılanysty. Qazaq tazysynyń joǵary júıke qyzmetiniń erekshe turaqtylyǵy ony basqa tuqymdardan aıryqsha etip kórsetedi. «Qazaq tazy» tuqymynyń ıtteri mehanıkalyq qoıanǵa júgiretin kýrsıngte, sondaı-aq osy tuqymnyń ıtterine arnalǵan jarystar men synaqtarda joǵary nátıjeler kórsetedi», – dep atap ótti baspasóz qyzmeti.
Qaýymdastyq ókilderi jyl saıyn el boıynsha ıtterdiń tuqym standarttaryna sáıkestigin baǵalaý úshin asyl tuqymdy kórmeler uıymdastyrady. Tazy ıtteri kez kelgen klımattyq jaǵdaıǵa – qystyń qatal sýyǵynan bastap ońtústiktiń aptap ystyǵyna deıin ońaı beıimdele alady.
