Memlekettik keńesshi Erlan Qarın jpzýshy Muhtar Maǵaýınniń qazasyna baılanysty kóńil aıtty, dep habarlaıdy “Adyrna” ulttyq portaly.
«Bes ǵasyrlyq jyraýlar poezııasyn týǵan halqynyń rýhanı qazynasyna qosqan, myń jyldyq tarıhymyzdy tańbalap, kórkem shejiresin jasaǵan klassık jazýshy, halqymyzdyń birtýar uly Muhtar Maǵaýın ómirden ozdy. Tutas qazaq halqyna, jazýshynyń áýleti men týǵan-týystaryna kóńil aıtamyn.
Memleket basshysy qalamgerdiń jary men balalarynyń qaıǵysyna ortaqtasyp hat joldady, tileýles peıilin bildirdi.
Barsha qazaq balasy sııaqty biz de bala kúnimizden Maǵaýın shyǵarmalaryn oqyp óstik. Onyń eńseńdi kóterip, ult tarıhyna maqtanyshyńdy oıatatyn rýhty shyǵarmalarymen eseıdik. Keıin dıdarlasyp, dámdes te boldyq. Qaıyn atam, belgili jazýshy Dıdahmet Áshimhan qalamgermen tanystyrǵany esimde. Muhtar Maǵaýınniń áıgili Tonykók jazbasyna súıenip turǵan sýreti bar. Quddy bitik tastan tyń tyńdap, myń jyldyq babalar ósıetin júregine sińirip turǵandaı. Qalamgerdiń bir ǵana beınesi onyń búkil bolmysyn, ómirlik mıssııasyn ashyp kórsetedi. Muhtar aǵanyń jarqyn beınesi dál osy qalpynda urpaq jadynda qalatyny sózsiz.
Ómiriniń sońǵy sátterine deıin qalamyn serik etip, jazýdan tanbaı ótken klassıktyń mol murasy qashanda týǵan eline qyzmet ete bermek.
Asyl aǵamyzdyń aldy peıish, arty kenish bolǵaı!» – dedi Erlan Qarın.
