مەملەكەتتىك كەڭەسشى ەرلان قارين جپزۋشى مۇحتار ماعاۋيننىڭ قازاسىنا بايلانىستى كوڭىل ايتتى، دەپ حابارلايدى “ادىرنا” ۇلتتىق پورتالى.
«بەس عاسىرلىق جىراۋلار پوەزياسىن تۋعان حالقىنىڭ رۋحاني قازىناسىنا قوسقان، مىڭ جىلدىق تاريحىمىزدى تاڭبالاپ، كوركەم شەجىرەسىن جاساعان كلاسسيك جازۋشى، حالقىمىزدىڭ ءبىرتۋار ۇلى مۇحتار ماعاۋين ومىردەن وزدى. تۇتاس قازاق حالقىنا، جازۋشىنىڭ اۋلەتى مەن تۋعان-تۋىستارىنا كوڭىل ايتامىن.
مەملەكەت باسشىسى قالامگەردىڭ جارى مەن بالالارىنىڭ قايعىسىنا ورتاقتاسىپ حات جولدادى، تىلەۋلەس پەيىلىن ءبىلدىردى.
بارشا قازاق بالاسى سياقتى ءبىز دە بالا كۇنىمىزدەن ماعاۋين شىعارمالارىن وقىپ وستىك. ونىڭ ەڭسەڭدى كوتەرىپ، ۇلت تاريحىنا ماقتانىشىڭدى وياتاتىن رۋحتى شىعارمالارىمەن ەسەيدىك. كەيىن ديدارلاسىپ، دامدەس تە بولدىق. قايىن اتام، بەلگىلى جازۋشى ديداحمەت ءاشىمحان قالامگەرمەن تانىستىرعانى ەسىمدە. مۇحتار ماعاۋيننىڭ ايگىلى تونىكوك جازباسىنا سۇيەنىپ تۇرعان سۋرەتى بار. قۇددى بىتىك تاستان تىڭ تىڭداپ، مىڭ جىلدىق بابالار وسيەتىن جۇرەگىنە ءسىڭىرىپ تۇرعانداي. قالامگەردىڭ ءبىر عانا بەينەسى ونىڭ بۇكىل بولمىسىن، ومىرلىك ميسسياسىن اشىپ كورسەتەدى. مۇحتار اعانىڭ جارقىن بەينەسى ءدال وسى قالپىندا ۇرپاق جادىندا قالاتىنى ءسوزسىز.
ءومىرىنىڭ سوڭعى ساتتەرىنە دەيىن قالامىن سەرىك ەتىپ، جازۋدان تانباي وتكەن كلاسسيكتىڭ مول مۇراسى قاشاندا تۋعان ەلىنە قىزمەت ەتە بەرمەك.
اسىل اعامىزدىڭ الدى پەيىش، ارتى كەنىش بولعاي!» – دەدى ەرلان قارين.
