Baspana máselesin sheshý úshin alǵashqy jarnany 5%-ke túsirip, jyldyq 5%-pen, 25 jylǵa, birinshi jáne ekinshi rynoktan da ala beretin jaǵdaı jasasa jetip jatyr. Tabysy eń tómengi jalaqy 42500 teńgeden assa boldy degen shartpen berilse logıkaǵa sııady. Sebebi, halyqtyń tabysyn 30 jylda osy deńgeıden asyra almaǵan ekonomıka qurǵan bıliktiń óz kinási.
15 mln eki bólmeli úıdiń alǵashqy jarnasy 750 myń teńge. 10 mln teńgelik bir bólmeli páterdiń alǵashqy salymy 500 myń teńge bolady. Bul Qazaqstandyqtar kótere alatyn sýmma.
Tóleı almasa páterdi alyp qoıatynyn biletin halyq ýaqytyly tóleıtinine kúmánim joq. Tólemese qaladaǵy páter baǵasy óspese túspeıdi. Bank utylmaıdy. Tegin berip jatqan joq nege sonsha másele týdyratyny maǵan túsiniksiz!
Jeke menshik bankterge mıllıradtap qarjy salǵan ulttyq qordyń qarjysy baspanaǵa bólinbegende qaıda bólinedi? Zeınetaqy qoryndaǵy aqshany Ázirbaıjanǵa salyp joq qylyp, EKSPO-ǵa salyp ta shashyp jatyr. 30 jylda neshe túrli baǵdarlamalarǵa qarjy shashyp nátıjesiz ketkenine el kýá. Sonda da zavod ashyp, ekonomıkany kóterip tastaǵanymyz shamaly. Bul júıeden ekonomıkalyq sekiris jasaıtyn reformatordy men kútpeımin óz basym. Biraq, "daı-daı" degen qoǵamǵa qarjyny baspana úshin halyqtyń búgingi kúnkóris deńgeıine shaqtap bir ret berse bolady dep oılaımyn.
30 jylda ekonomıkany keremet qylmadyńyzdar. Endi eń bolmaǵanda munaı men gazdy satyp áleýmettik salada birdeńe istep ketińizder. Túbi ketesizder. Ol ýaqyt ta jyl ótken saıyn jaqyndap keledi. Keleshekte aldyńǵy býyn týraly el aýzynan tastamaı aıtyp júrer halyqtyń esinde qalar birdeńe qalsyn!
Baýyrjan SERIKBAEV
"Adyrna" ulttyq portaly
