Memleket basşysy Qasym-Jomart Toqaev "Ana tılı" gazetıne bergen sūhbatynda memlekettık tıl mäselesıne toqtaldy, dep habarlaidy “Adyrna” ūlttyq portaly.
Prezident dünie jüzınde 7 myŋnan astam tıl bar ekenın atap öttı.
"Sonyŋ ışınde üş myŋnan astam tılge joiylyp ketu qaupı tönıp tūr. Qazaq tılı būl topqa kırmeidı. Ana tılımız 2024 jyly älemde eŋ keŋ taralǧan tılderdıŋ arasynda 79-orynǧa tūraqtady. Osy rette kürdelı ärı qarama-qaişylyqqa toly keŋes zamanynda ana tılımızdı älemdık lingvistika kartasynan joiylyp ketuden saqtap qalǧan ziialy qauym ökılderınıŋ, aqyn-jazuşylardyŋ, jurnalister men ǧalymdardyŋ, mūǧalımder men mädeniet qairatkerlerınıŋ, auyl eŋbekkerlerınıŋ, iaǧni barşa otanşyl azamattardyŋ eŋbegın baǧalauymyz kerek. Būdan da joǧary nätijege qol jetkızu üşın ǧylym-bılım salasyndaǧy infraqūrylymdy jaŋǧyrtuǧa, mektepter men basqa da oqu oryndarynda qazaq tılın üiretu jüiesın jetıldıruge qosa oqytuşylardyŋ märtebesın arttyru mäselesın de şeşu qajet. 2023 jyly "Qazaq tılı" qoǧamynyŋ bastamasymen qūrylǧan arnauly qorǧa qoldau körsetu kerek. Sifrlyq tehnologiialardy qoldanuǧa basa män bergen jön. Öitkenı qazaq tılınıŋ aldaǧy taǧdyry, elımızdıŋ jahandyq bäsekege qabıletı köbıne osyǧan bailanysty bolady", – dedı Memleket basşysy.
Toqaevtyŋ sözınşe, şyǧarmaşyl jastar jäne kreativtı industriia memlekettık tıldı damytu ısıne paidasyn tigıze alady.
"Memleket ekonomikadaǧy bolaşaǧy zor osy salanyŋ örkendeuıne barynşa qoldau körsetedı. Otandyq jäne älemdık naryqta qarjylyq jaǧynan tiımdı ärı sūranysqa ie bolatyn türlı kontenttı qazaq tılınde jasau qajet. Būl jerde ädebiet, muzyka, kino, serial jäne kompiuter oiyndary turaly aityp otyrmyn. Ana tılımızdıŋ bolaşaǧy jarqyn ekenıne menıŋ eş kümänım joq. Qazaq tılı memlekettık tıl retınde halqymyzdy ūiystyru jolynda maŋyzdy röl atqara beredı. Bıraq tılımızdıŋ tūǧyryn nyǧaitamyz dep, ony basqa tılderge, sonyŋ ışınde orys tılıne qarsy qoimau kerek", – dedı Memleket basşysy.
Prezidenttıŋ osydan bır jyl būryn da, 2024 jyly 3 qaŋtarda «Egemen Qazaqstan» gazetıne bergen kölemdı sūhbaty jariialanǧan. Sonda Prezident ışkı jäne syrtqy saiasat, eldıŋ äleumettık-ekonomikalyq damuy, 2022 jylǧy Qaŋtar oqiǧasy, tūrmystyq zorlyq-zombylyq, atom elektr stansiialarynyŋ qūrylysy jäne basqa da özektı taqyryptarǧa qatysty sūraqtarǧa jauap bergen edı.
