«Ortalyq Azııa – Qytaı» formatyndaǵy Syrtqy ister mınıstrleriniń 5-kezdesýine qatysý aıasynda Premer-Mınıstrdiń orynbasary – Syrtqy ister mınıstri Murat Nurtileý Qytaı Halyq Respýblıkasynyń Syrtqy ister mınıstri Van Imen kezdesý ótkizdi. Bul týraly 1 jeltoqsanda SIM baspasóz qyzmeti jazdy, dep habarlaıdy «Adyrna» tilshisi.
Kelissózder barysynda taraptar ekijaqty yntymaqtastyqtyń aǵymdaǵy ahýaly men odan ári damý keleshegin, asa joǵary jáne joǵarǵy deńgeılerde qol jetkizilgen ýaǵdalastyqtardyń iske asyrylý barysyn talqylady, sondaı-aq óńirlik jáne halyqaralyq kún tártibindegi ózekti máseleler boıynsha pikir almasty.
Saýda-ekonomıkalyq, tranzıt-kóliktik yntymaqtastyqty arttyrý jáne energetıkalyq qaýipsizdikti qamtamasyz etýge, sondaı-aq Qazaqstannyń Qytaıǵa shıkizattyq emes eksportyn ulǵaıtý jónindegi birlesken kúsh-jigerdiń mańyzdylyǵy atalyp ótti.
«Bıyl 10 aıdyń ishinde ekijaqty taýar aınalymy 36,5 mlrd AQSh dollary kóleminde rekordtyq kórsetkishke jetti, bul ótken jyldyń sáıkes kezeńindegi kórsetkishterden 11%-ǵa artyq»,—delingen habarlamada.
Bilim berý almasýlaryn keńeıtý, ǵylymı zertteýlerdi qoldaý jáne birlesken mádenı is-sharalardy ótkizýdi qosa alǵanda, mádenı-gýmanıtarlyq yntymaqtastyq máseleleri kelissózderdiń jeke pýnkti boldy.
«Qazaqstan men Qytaı kórshiler ǵana emes, sonymen qatar qazirgi zamannyń syn-qaterlerimen birlesip kúresýge jáne óńirdiń turaqty damýyn qamtamasyz etýge qabiletti strategııalyq seriktester», – dedi Murat Nurtileý.
Óz kezeginde Van I Qytaı Qazaqstanmen dostyq qarym-qatynasty joǵary baǵalaıtynyn jáne eki halyqtyń ózara paıdasy men órkendeýi úshin olardy odan ári tereńdetýge umtylatynyn atap ótti.
