Maŋǧystau oblysynda halyq emşılıgı kezınde nauqastyŋ ölımıne qatysty ıs apelliasiialyq satyda qaita qaralyp, sottalǧan äielge taǧaiyndalǧan jaza jeŋıldetıldı. Būl turaly Lada.kz basylymy jazdy, dep habarlaidy “Adyrna”.
Aqparatqa säikes, Mūnaily audandyq soty 2026 jylǧy 19 nauryzda B. esımdı tūrǧyndy abaisyzda adam ölımıne sebepker bolu baby boiynşa (QR QK 104-babynyŋ 1-bölıgı) kınälı dep tanydy. 49 jastaǧy äiel Aqtau qalasyndaǧy №1 qalalyq emhanada medbike bolyp jūmys ıstei otyryp, tiıstı bılımı men lisenziiasy joq bolsa da, üiınde «halyq emşılıgı» qyzmetın körsetken.
Sot mälımetınşe, 2025 jylǧy 26 qaraşada şamamen saǧat 20:30-da Mūnaily audanynyŋ Maŋǧystau auylyndaǧy öz üiınde ol keluşını «emdeu» barysynda onyŋ tamaǧyn qolymen qysyp qalǧan. Sonyŋ saldarynan er adam oqiǧa ornynda köz jūmǧan.
Bırınşı satydaǧy sot B.-ǧa 1 jyl 6 ai merzımge bas bostandyǧynan aiyru jazasyn taǧaiyndady. Jaza eŋ tömengı qauıpsızdık mekemesınde öteluı tiıs edı. Alaida sottalǧannyŋ kämeletke tolmaǧan balasy bar ekenın eskerıp, QR QK-nıŋ 74-baby negızınde jaza öteu keiınge qaldyrylǧan.
Taǧaiyndalǧan jazaǧa kelıspegen qorǧauşylar apelliasiialyq şaǧym tüsırdı. Olar sottalǧannyŋ kınäsın tolyq moiyndaǧanyn jäne jäbırlenuşı taraptyŋ keşırım bergenın alǧa tartyp, bas bostandyǧynan aiyru jazasyn jeŋılırek jazaǧa auystyrudy sūrady.
Maŋǧystau oblystyq sotynyŋ qylmystyq ıster jönındegı sot alqasy ıstı qarap, jaza taǧaiyndau kezınde jeŋıldetetın män-jailar tolyq eskerılmegen degen qorytyndyǧa keldı. Qylmys auyrlyǧy az sanatqa jatqyzylyp, bap sanksiiasynda balama jaza türlerı qarastyrylǧany atap ötıldı.
Nätijesınde apelliasiialyq saty ükımdı jaza bölıgınde özgerttı. Äielge 1 jyl 6 ai merzımge bas bostandyǧyn şekteu jazasy taǧaiyndaldy jäne probasiialyq baqylau belgılendı: oǧan uäkılettı organdardy habardar etpei tūrǧylyqty jerın jäne jūmys ornyn auystyruǧa, oiyn-sauyq oryndary men alkogol tūtynatyn jerlerge baruǧa, sondai-aq tüngı uaqytta (22:00-den 06:00-ge deiın) üiden şyǧuǧa tyiym salyndy. Sonymen qatar, sot oǧan emşılıkpen (balgerlıkpen) ainalysuǧa da tyiym saldy.
