«ورتالىق ازيا – قىتاي» فورماتىنداعى سىرتقى ىستەر مينيسترلەرىنىڭ 5-كەزدەسۋىنە قاتىسۋ اياسىندا پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ قىتاي حالىق رەسپۋبليكاسىنىڭ سىرتقى ىستەر ءمينيسترى ۆان يمەن كەزدەسۋ وتكىزدى. بۇل تۋرالى 1 جەلتوقساندا ءسىم ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەلىسسوزدەر بارىسىندا تاراپتار ەكىجاقتى ىنتىماقتاستىقتىڭ اعىمداعى احۋالى مەن ودان ءارى دامۋ كەلەشەگىن، اسا جوعارى جانە جوعارعى دەڭگەيلەردە قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىن تالقىلادى، سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
ساۋدا-ەكونوميكالىق، ترانزيت-كولىكتىك ىنتىماقتاستىقتى ارتتىرۋ جانە ەنەرگەتيكالىق قاۋىپسىزدىكتى قامتاماسىز ەتۋگە، سونداي-اق قازاقستاننىڭ قىتايعا شيكىزاتتىق ەمەس ەكسپورتىن ۇلعايتۋ جونىندەگى بىرلەسكەن كۇش-جىگەردىڭ ماڭىزدىلىعى اتالىپ ءوتتى.
«بيىل 10 ايدىڭ ىشىندە ەكىجاقتى تاۋار اينالىمى 36,5 ملرد اقش دوللارى كولەمىندە رەكوردتىق كورسەتكىشكە جەتتى، بۇل وتكەن جىلدىڭ سايكەس كەزەڭىندەگى كورسەتكىشتەردەن 11%-عا ارتىق»،—دەلىنگەن حابارلامادا.
ءبىلىم بەرۋ الماسۋلارىن كەڭەيتۋ، عىلىمي زەرتتەۋلەردى قولداۋ جانە بىرلەسكەن مادەني ءىس-شارالاردى وتكىزۋدى قوسا العاندا، مادەني-گۋمانيتارلىق ىنتىماقتاستىق ماسەلەلەرى كەلىسسوزدەردىڭ جەكە پۋنكتى بولدى.
«قازاقستان مەن قىتاي كورشىلەر عانا ەمەس، سونىمەن قاتار قازىرگى زاماننىڭ سىن-قاتەرلەرىمەن بىرلەسىپ كۇرەسۋگە جانە ءوڭىردىڭ تۇراقتى دامۋىن قامتاماسىز ەتۋگە قابىلەتتى ستراتەگيالىق سەرىكتەستەر»، – دەدى مۇرات نۇرتىلەۋ.
ءوز كەزەگىندە ۆان ي قىتاي قازاقستانمەن دوستىق قارىم-قاتىناستى جوعارى باعالايتىنىن جانە ەكى حالىقتىڭ ءوزارا پايداسى مەن وركەندەۋى ءۇشىن ولاردى ودان ءارى تەرەڭدەتۋگە ۇمتىلاتىنىن اتاپ ءوتتى.
