Zamanbek Nurqadilovtiń birinshi áıeli qaıtys boldy. Bul týraly onyń qyzy Quralaı Nurqadilova Instagram-paraqshasynda jazdy, dep habarlaıdy “Adyrna” ulttyq portaly.
"Búgin túnde elimiz úshin mańyzdy tulǵa ómirden ótti. Ol – Zamanbek Nurqadilovtiń qalyptasý jyldarynda serigi bolǵan áıel. Saıasatta aqyldy, bilimdi jáne saýatty Nurbıke Ilimbaıqyzy. Sonymen qatar óte qarapaıym jáne zııaly jan edi. Ol týraly kóp aıtýǵa bolady", – dep jazdy Quralaı Nurqadilova.
Onyń aıtýynsha, anasy Keńes Odaǵy kezindegi jáne odan keıingi eldiń jaǵdaıy týraly kóp nárse aıta alatyn edi. Kóptegen jas saıasatkerler onyń qoldaýymen alǵa jyljyǵan. Ol barlyq tarıhı oqıǵalardy jaqsy biletin jáne olardy óte qyzyq jetkize alatyn.
"Meniń anamnyń danalyǵyna ony tanıtyn árbir adam tánti bolatyn. Imandy bol, anashym, qolymnan kelgenniń bárin jasadym!", – dedi Quralaı Nurqadilova.
Nurbıke Nurqadilova 79 jasynda ómirden ótti.
Aıta keteıik, Zamanbek Nurqadilov – Qazaqstannyń memleket jáne qoǵam qaıratkeri, Qazaqstannyń prezıdenti bolǵan Nursultan Nazarbaevty ashyq synap, ony "bılikti zańsyz ıemdenip, jemqorlyq jasady" dep aıyptaǵan saıasatker.
Zamanbek Nurqadilov te qarasha aıynda ómirden ótken edi. 2005 jyly 12 qarashada ózin-ózi úsh ret atty dep habarlanǵan.
