Filosofiia ǧylymdarynyŋ doktory, halyqaralyq deŋgeide tanymal zerger, käsıpker Iliias Mūhamed-Halelūly Süleimanov ömırden öttı, dep habarlaidy "Adyrna" ūlttyq portaly.
Qaraly habardy Facebook jelısınde qoǧam belsendısı Qanat Eskendır mälımdedı.
«Memleketke abyroi syilap, özı eskerusız kettı… Qazaq zergerlık käsıpöner tarihy ülken tūlǧasyn joǧaltty», – dep jazdy ol.
Iliias Süleimanov 1964 jyly 25 mausymda Almaty qalasynda düniege kelgen. Äkesı Mūhamed-Halel Süleimanov – fizik, publisist, anasy Ümıtjan Şäikemeleva – fiziolog, ūzaq jyldar Ǧylym akademiiasynda qyzmet atqarǧan. Iliiastyŋ esımı körnektı memleket qairatkerı Iliias Omarūly Omarovtyŋ qūrmetıne qoiylǧan.
Bolaşaq zerger bılımın ataqty fizika-matematika mektebınde bastap, keiın Qazaq memlekettık universitetınıŋ matematika fakultetın tämamdady. Studenttık şaǧynda QazMU-de «Rezonans» saiasi klubyn basqaryp, qoǧamdyq-saiasi ortada belsendılıgımen közge tüstı. Äsker qatarynda Auǧanstanda qyzmet etıp, aǧa leitenant şenınde elge oraldy.
Äskerden keiın Qazaq KSR Ǧylym akademiiasynyŋ Filosofiia jäne qūqyq institutynda aspiranturada oqydy. Täuelsızdık jyldarynyŋ basynda zergerlık önerge bet būryp, 1991 jyly Qazaqstandaǧy alǧaşqy jeke zergerlık käsıporyndardyŋ bırı – «Zerger» firmasyn qūrdy.
Keiın «Zerger Ilyas» brendımen tanylǧan kompaniia 1990 jyldary otandyq zergerlık būiymdardy Europa naryǧyna eksporttaǧan alǧaşqy käsıporyndardyŋ bırıne ainaldy. 1995 jyly Iliias Süleimanov Parijde ötken «BIJOHRCA» halyqaralyq körmesıne qatysyp, qazylar alqasynyŋ qataŋ ırıkteuınen ötken qazaqstandyq zerger retınde tarihta qaldy.
Iliias Süleimanov tek käsıpker ǧana emes, qoǧamǧa janaşyr mesenat retınde de tanyldy. Onyŋ basşylyǧymen «Zerger» kompaniiasy Auǧan soǧysy ardagerlerıne päterler men avtokölıkter syilap, emdeluge jäne qajylyq saparǧa baruyna qoldau körsettı. Sondai-aq internasionalist-jauyngerlerge arnalǧan eskertkış qūrylysyna, ädebi jinaqtardyŋ jaryq köruıne demeuşılık jasady.
