Qaraǵandyda 4 jyl buryn salynǵan jańa mektep oqýshylarǵa qaýip tóndirip otyr, dep habarlady “Adyrna” ulttyq portaly "Astana TV" telearnasyna silteme jasap.
Kórý qabileti buzylǵan balalarǵa arnalǵan mektep qulaı bastady. Qabyrǵasynda jaryq paıda boldy, betonnyń qorǵanysh qabaty qulady, tipti armatýra da ashyldy.
Mektep qurylysyna bıýdjetten 1,5 mıllıard teńge jumsalǵan.
Mamandar pandemııa balalardy qandaı da tótenshe jaǵdaıdan saqtap qalǵanyn aıtty. Sebebi sabaqtar onlaın júrgendikten, der kezinde saraptama júrgizip, qabyrǵalardy, shatyr men edendi tolyq teksergen. Sot mektep-ınternattyń jumysyn toqtatty.
"Sportzal, synyptar, jatyn bólme jaqtyń shatyry qaýipti jaǵdaıda tur. Ǵımarattan úlken jaryq anyqtaldy. Ol birshama qısaıdy, bul balalar men qyzmetkerlerdiń ómiri men densaýlyǵyna qaýip tóndiredi. Eń bastysy – sot sheshimi. Sheshim boıynsha mektep ǵımaraty aýmaǵyna kelýge tyıym salynǵan", - dep habarlady Qaraǵandy oblysy bilim basqarmasynyń bas mamany Lıýdmıla Gavrılenko.
Bilim basqarmasynyń habarlaýynsha, tegin jóndeý júrgizýge berilgen kepildik merzimi aıaqtaldy. Alaıda qurylysshylar qarjylyq jaýapkershilikke tartylady.
Al mektep basshylyǵy shuǵyl túrde 100 oqýshy men 113 muǵalimge arnalǵan jańa ǵımarat izdep jatyr. Al mektepke olar kúrdeli jóndeýden keıin ǵana oralady.
"Biz bul jer tolyq qaýipsiz bolǵan kezde ǵana oralamyz. Erekshe balalar úshin mektepti ar-uıatpen salý kerek edi. Bolar is boldy. Qazir tolyq qalpyna keltirý úshin smeta daıyndalyp jatyr. Dál qazir qansha qarajat qajet ekenin aıtý qıyn. Alaıda biz bul mektepke kelesi oqý jylynda oralýdy josparlap otyrmyz", - dedi kórý qabileti buzylǵan balalarǵa arnalǵan №1 mektep-ınternatynyń dırektory Aıman Tilegenova.
