Áýejaıda reısinen keshikken qyz FlyArystan áýekompanııasy qyzmetkerine qol kótergeni anyqtaldy, dep habarlaıdy "Adyrna" ulttyq portaly.
Oqıǵa 14 qańtarda bolǵan.
Kompanııanyń baspasóz qyzmeti oqıǵaǵa qatysty túsinikteme berdi.
2025 jyldyń 14 qańtarynda Almaty – Astana baǵyty boıynsha FS 7057 reısiniń jolaýshysy Almaty halyqaralyq áýejaıynda FlyArystan qyzmetkerine shabýyl jasaǵan. Endi jolaýshy kompanııanyń «qara tizimine» enetini aıtyldy.
«Jolaýshy reıs ýaqytynan 30 mınýt buryn tirkeý baǵanyna kelip, reıske tirkelgenin rastaǵannan keıin, tekserý aımaǵyna baǵyttaldy. Alaıda jetkiliksiz ýaqyt qalýyna baılanysty jolaýshy reıske otyrǵyzýǵa úlgermeı qalǵan. Osy rette, reıske otyrǵyzý ushý ýaqytyna 30 mınýt qalǵanda bastalatynyn jáne osy ýaqytta barlyq jolaýshylardyń geıtte bolýy qajet ekenin eske salamyz.
Osydan keıin jolaýshy tirkeý aımaǵyna qaıta oralyp, tekserý aımaǵyna baǵyt kórsetken qyzmetkerge qatysty agressıvti minez-qulyq kórsete bastady. Oqıǵa barysynda ol qyzmetkerdiń jeke mobıldi telefonyn laqtyryp, beti men ishine soqqy jasady jáne sózben qorqytýdy jalǵastyrdy. Bul agressııalyq áreket beınekameralarda jáne kýágerlerdiń málimdemesimen rastalǵan», - delingen habarlamada.
