"Bomjdaı bolsa ǵoı barlyǵy..."

837

 

Osy ýaqytqa deıin úısiz-kúısiz kóshede qańǵyp júrgen «bomjdarǵa» jıirkenishpen qaraıtyn edim. Allaǵa shúkir, óz basymda otbasylyq jaǵdaıym jaqsy. Taraz qalasyndaǵy baı-baǵlandar turatyn aýdandaǵy kottedjderdiń birinde kúıeýim jáne eki qyzymmen jurt qatarly ómir súrip jatqan jaıym bar. Biraq osy ýaqytqa deıin kóshede alaqan jaıyp otyrǵan qaıyrshyǵa da, úı-jaıy joq músápirlerge de baqyr tıyn sadaqa bergen emespin. Sebebi mundaı aıanyshty taǵdyrǵa ózderi kináli dep oılaıtynmyn. Ondaı adamdar tek bir kúndik tamaǵyn oılap, ony tabý úshin urlyqqa da, basqasha teris áreketke de barady dep esepteıtinmin. Búginde shynaıy qaıyrshy men «qaıyrshy» atyn jamylǵan dáýlettilerdi ajyrata almaı qaldyq qoı. Árıne, taǵdyrdyń taýqymetine túsken jandardyń kóbisi eńselerin kótere almaı kóshe jaǵalaıtyn jaǵdaıǵa jetetin shyǵar. Degenmen «esektiń artyn jýsa da» bir úzim nanyn taýyp, ózgelerdiń «sadaqasyna» muqtajdyqtan qutylýyna bolady ǵoı.
Aıtaıyn degenim, qoǵamnyń tómengi satysynda júrgen osyndaı azamattar jaıly pikirim bir «bomjdyń» arqasynda bir kúnde ózgerip shyǵa keldi. Ádettegideı kóligimmen qyzymdy balabaqshaǵa apara jatqanmyn. Balabaqshaǵa jetken soń qyzym kólikten túsip, aldy-artyna qaramaı kósheniń arǵy betine asyǵys júgire jónelmesi bar ma? Záre qutym qalmaı sońynan júgire jóneldim. Osy sátte taldyń saıasynda otyrǵan julym-julym kıimdegi, bet-aýzy isip ketken, túri qorqynyshty bir kisi qalaısha ábjil qımyldap úlgergenin qaıdam, qyzymdy zýlaǵan kólikkke qaqqyzbaı qutqaryp qaldy. Oqıǵa qas pen kózdiń arasynda bolyp, azdap abdyrap turyp qaldym. Aıaýlymdy aman-esen álgi kisiniń qolynan kórgende janarymnan eriksiz jas saýlap qoıa berdi. Qaıyrshy qyzymdy janyma ákelip, aǵashtyń túbine qaıta otyra ketti. Óz-ózime kelgennen keıin Aıaýlymdy kólikkke qaıta otyrǵyzdym da ámııanymnan alǵan 5000 teńge «qutqarýshyǵa» usynyp, rahmetimdi aıttym. Shamamen elýlerden asqan kisi (ózim solaı topshyladym) maǵan jaqtyrmaǵan keıippen qarap turyp: «Osy baılar bárin aqshamen sheshýge qumar»,- dedi de júrip ketti. Qatty tańyrqadym. Isherge asy, jatarǵa tósegi bolmasa da men usynǵan aqshany kerek etpedi. Túgi joq bolsa da namysyn bárinen joǵary qoıǵanyna rıza boldym. Eger onyń ornynda kóılegi kók, tamaǵy toq bireý bolsa jasaǵan jaqsylyǵym úshin dep qyzyl qaǵazdy alar edi ǵoı. Álgi «bomjdyń» ótken ómirinde qandaı adam bolǵany, otbasynyń bar-joǵy árıne maǵan jumbaq. Biraq osy oqıǵadan keıin kóshe jaǵalaǵandardyń barlyǵy ury-qary emes, olardyń da jany taza, adamgershiligi mol, júregi názik ekenderin uǵyndym. Biz, adamdar, úısiz qańǵyp júrgen jandarǵa az bolsa da meıirimmen qaraıyqshy.

Sharıpa Sársenbaeva,
Taraz qalasynyń turǵyny.

Vk "Saryarqa"-tobynan

Pikirler