Qorǵanys mınıstrligi jelide qyzý talqylanǵan mınıstr men otbasynyń sýretine qatysty pikir bildirdi, dep habarlaıdy "Adyrna" ulttyq portaly.
Qorǵanys mınıstri Rýslan Jaqsylyqovtyń otbasymen túsken fotosy Astanadaǵy fotostýdııanyń paraqshasynda tamyz aıynda jarııalanǵan. Onda sýrettiń mınıstrdiń ruqsatymen jarııalanǵany aıtylǵan. Alaıda sol kezde mınıstrlik tarapynan fotoǵa qatysty túsindirme bolmady. Tek búgin Májilis kýlýarynda qorǵanys mınıstrliginiń resmı ókili Rýslan Janǵýlın fotosessııaǵa qatysty pikir bildirdi.
General-polkovnık Rýslan Jaqsylyqovtyń jubaıy jáne 3 balasymen áskerı kıim kıip, medaldarmen fotosessııa jasaǵanyn kórýge bolady. Kópshilik 58 jastaǵy mınıstrdiń áıeliniń ózinen áldeqaıda jas ekenine nazar aýdaryp, tańdana pikir jazǵan. Derekkózde Jaqsylyqovtyń áıeli Ulttyq ulanda bıshi ekeni, esimi Elmıra ekeni anyqtalǵan. General-polkovnıktiń áıeli de áskerı shenge ıe.
Qorǵanys mınıstrliginiń baspasóz qyzmeti mınıstrdiń otbasylyq fotosessııasyna qatysty resmı saýalǵa jaýap bermedi. Al jeli oqyrmandary qorǵanys mınıstriniń áıelinde osynsha kóp medaldiń qaıdan ekenin bilýge asyqqan. Keıinnen qorǵanys mınıstrliginiń resmı ókili Rýslan Janǵýlın:
«Qorǵanys mınıstriniń otbasylyq fotosýretteri onyń resmı qyzmetine qatysy joq ekenin aıtamyn. Medaldarǵa keletin bolsaq, qorǵanys mınıstriniń áıeli de áskerı qyzmetshi. Mınıstrdiń áıeli taqqan medaldar Ulttyq ulan men mereıtoılyq marapattar», - dedi qorǵanys mınıstrliginiń ókili.
Aıta keteıik, bir jyldyń ishinde qazaq áskerinde adam shyǵyny kóbeıgen. Odan bólek, áskerdegi álimjettik máselesi de órship turǵany belgili.
Rýslan Jaqsylyqov Qańtar oqıǵasynan keıin 2022 jylǵy 19 qańtardan bastap Qorǵanys mınıstri bolyp taǵaıyndalǵan bolatyn.
2022 jylǵy mamyrda general-polkovnık ataǵyn alǵan.
