Soltústik Qazaqstan oblysynda 3 aýdan ákimi jaýapqa tartyldy. Bul týraly óńir prokýrory Qaırat Ábdihanov kommýnaldyq qaldyqtardy basqarý kezinde ekologııalyq zańnamany saqtaý máselesi boıynsha alqa otyrysynda aıtty, dep habarlaıdy “Adyrna” ulttyq portaly.
Prokýrordyń aıtýynsha, júrgizilgen taldaý nátıjesinde qaldyqtarmen jumys isteý kezinde zańnama talaptarynyń óreskel buzylǵany anyqtalǵan. Prokýrorlardyń aralasýynan keıin 11 aýdanda turǵyndar úshin qaldyqtardy jınaýǵa, tasymaldaýǵa, suryptaýǵa jáne kómýge tarıfter belgilendi.
«Oblystyń taǵy 6 aýdanynda negizsiz kóterilgen tarıfterdi tómendetý boıynsha sharalar qabyldanyp jatyr. Ekologııalyq zańnama talaptaryn saqtamaǵany úshin ártúrli 95 adam jaýapkershilikke tartyldy, onyń ishinde 3 aýdan ákimi bar», delingen habarlamada.
Otyrys qorytyndysy boıynsha uıymdastyrýshylyq jáne praktıkalyq sharalar qabyldanyp, jergilikti atqarýshy jáne ýákiletti organdarǵa naqty tapsyrmalar berildi.
