سولتۇستىك قازاقستان وبلىسىندا 3 اۋدان اكىمى جاۋاپقا تارتىلدى. بۇل تۋرالى ءوڭىر پروكۋرورى قايرات ءابدىحانوۆ كوممۋنالدىق قالدىقتاردى باسقارۋ كەزىندە ەكولوگيالىق زاڭنامانى ساقتاۋ ماسەلەسى بويىنشا القا وتىرىسىندا ايتتى، دەپ حابارلايدى “ادىرنا” ۇلتتىق پورتالى.
پروكۋروردىڭ ايتۋىنشا، جۇرگىزىلگەن تالداۋ ناتيجەسىندە قالدىقتارمەن جۇمىس ىستەۋ كەزىندە زاڭناما تالاپتارىنىڭ ورەسكەل بۇزىلعانى انىقتالعان. پروكۋرورلاردىڭ ارالاسۋىنان كەيىن 11 اۋداندا تۇرعىندار ءۇشىن قالدىقتاردى جيناۋعا، تاسىمالداۋعا، سۇرىپتاۋعا جانە كومۋگە تاريفتەر بەلگىلەندى.
«وبلىستىڭ تاعى 6 اۋدانىندا نەگىزسىز كوتەرىلگەن تاريفتەردى تومەندەتۋ بويىنشا شارالار قابىلدانىپ جاتىر. ەكولوگيالىق زاڭناما تالاپتارىن ساقتاماعانى ءۇشىن ءارتۇرلى 95 ادام جاۋاپكەرشىلىككە تارتىلدى، ونىڭ ىشىندە 3 اۋدان اكىمى بار»، دەلىنگەن حابارلامادا.
وتىرىس قورىتىندىسى بويىنشا ۇيىمداستىرۋشىلىق جانە پراكتيكالىق شارالار قابىلدانىپ، جەرگىلىكتى اتقارۋشى جانە ۋاكىلەتتى ورگاندارعا ناقتى تاپسىرمالار بەرىلدى.
