Qaraǵandyda lıft ishinde zorlyq qurbany bola jazdaǵan jasóspirimniń anasy sot úkimimen kelispeıtinin aıtyp, málimdeme jasady, dep habarlaıdy “Adyrna” ulttyq portaly.
Eske sala keteıik, Qaraǵandyda 24 jastaǵy er adam 14 jastaǵy qyzǵa lıft ishinde azǵyndyq jasaǵan. Ol qyzdy páterine shaqyryp, betinen súıgen, ári lıftten shyǵarmaı qoıǵan. Onyń bul áreketi beıne baqylaý kamerasyna túsip qalǵan bolatyn.
Keıin kúdikti ustalyp, "Buzaqylyq" babymen 3 táýlikke qamaýǵa alyndy.
Jábirlenýshiniń anasy bolǵan jaǵdaıdan keıin qyzynyń psıhologııasyna zaqym kelgenin aıtady.
"Qyzym zorlyqtyń qurbany boldy. Eseńgirep qalǵan. Qazir podezge shyǵýǵa qorqady. Lıftige kiredi, biraq tipti erkekterden qorqatyn bolǵan. Jylaıdy. Ol ózge adamdarmen lıftige kirýge bolmaıtynyn biledi, alaıda ol artynan júgirip kelgen", – dedi anasy Almıra Ábdikárimova.
Polıııa er adamnyń sol podezdiń besinshi qabatynda turatynyn anyqtaǵan. Keıin jergilikti turǵyndar kúdiktini taýyp, keshirim suratqan. Málim bolǵandaı Qaraǵandyǵa Túrkistan oblysynan kelgen, áıeli men balalary bar. Vıdeoda ol qyzdy páterge shaqyrǵanyn jáne "aram oıy bolǵanyn" moıyndady.
"Úıge shaqyrdym. Aram oıym boldy, moıyndaımyn. Bul – shyndyq. Muny joqqa shyǵarmaımyn, barlyǵyn moıyndaımyn", – deıdi ol.
Sot úkimimen er adam úsh táýlikke ǵana qamaldy. Sebebi kúdikti lıft ishinde fızıkalyq kúsh kórsetpegen. Alaıda jasóspirimniń anasy sheshimmen kelispeıdi, endi qaıta aryz túsirmek. Ol jazany qatańdatýdy surap otyr. Al er adam basqa jaqqa kóship ketken.
