Qaraǧandyda Qazaqstan halqy Assambleiasynyŋ 30 jyldyǧyn merekeleu bastaldy. Mereitoilyq künge jäne Jūmysşy käsıpterı jylyna orai Aqsaqaldar keŋesı «Adal azamat» jobasyn ūsyndy. Jeŋımpazdar jetı nominasiia boiynşa marapattaldy. Laureattar – ärtürlı mamandyq ielerı, olar özderınıŋ kündelıktı eŋbegımen öŋırdıŋ jäne jalpy eldıŋ damuyna eleulı üles qosuda.
– Bız barşaǧa maŋyzdy kün – Qazaqstan halqy Assambleiasynyŋ 30 jyldyǧyn atap ötemız. Qoǧamdaǧy bırlık pen beibıtşılık bızdıŋ barlyq jetıstıkterımızdıŋ basty kepılı bolǧan jäne bolyp qala beredı. Assambleianyŋ barlyq qūrylymdary elımızdıŋ äleumettık jäne qoǧamdyq damuyna özderınıŋ baǧa jetpes ülesterın qosuda. Bıraq, menıŋ oiymşa, Aqsaqaldar keŋesınıŋ erekşe orny bar. Aqsaqaldar – bızdıŋ halqymyzdyŋ danalyǧy, aqyly, täjıribesı ǧoi! – dep Qaraǧandy oblysynyŋ äkımı Ermaǧanbet Bölekpaev merekenıŋ syily meimandaryn qūrmetpen qarsy aldy.
QHA töraǧasynyŋ orynbasary, QR PÄ QHA Hatşylyǧynyŋ meŋgeruşısı Marat Äzılhanov mereitoilyq jylda 400-den astam ırı ıs-şara josparlanyp otyrǧanyn habarlady.
– Bırlık pen eŋbek – bızdıŋ qoǧamymyzdyŋ güldenuınıŋ negızı. Būl ıs-şaralar adamdar arasynda, onyŋ ışınde eŋbek adamynyŋ janynda boluǧa baǧyttalǧan. Eŋbek adamdaryn qūrmetteuge arnalǧan bügıngı joba – solardyŋ bırı, – dep atap öttı ol.
Öz qyzmetınıŋ üzdıkterın qoǧamdyq komissiia taŋdady.
Bas marapatqa eŋbek ardagerı, Būqar jyrau audanynyŋ qūrmettı tūrǧyny Nesıbeldı Dosanova ie boldy. Ol 17 jasynda sauynşy bolyp jūmysqa kırısıp, 40 jyldai eŋbek ettı. Köp balaly otbasynda ülkenderdıŋ bırı bolyp, bes balany özı ösırdı. Bügınde Nesıbeldı apanyŋ 11 nemere men 16 şöberesı bar. Ūzaq ömır sürgen ana köptegen marapattarǧa ie bolǧan. Ol ekı «Eŋbek Qyzyl Tu» ordenın eŋ qūndy marapat dep sanaidy.
«Eren eŋbek iesı» nominasiiasyn kenşı, «Şahter daŋqy» iegerı Nūrlan Sätmaǧambetov ielendı.
– Ūly Otan soǧysy kezınde menıŋ äjem şahtada jūmys ıstep, kömır öndırıp, erlerdıŋ eŋbegın öz moinyna aldy. Äskerden keiın uchilişede oqyp, «Stahanovskaia» şahtasynda jūmys ıstei bastadym. Mıne, 36 jyldan berı jer astynda eŋbek etıp kelemın. Qazır Tüsıp Küzembaev atyndaǧy şahtada brigada basqaramyn. Öz täjıribemdı jas jūmysşylarǧa üiretudemın, – dedı laureat. – Bügın marapattalǧanym quantady. Mūny kütpegen edım. Bızdıŋ brigada köpūltty: onda 37 adam jäne barlyǧy türlı ūlt ökılderı.
«Erjürek qūtqaruşy» nominasiiasynda qūtqaruşy Maǧarbi Būzyrqaevty atap öttı. Qaraǧandy qalasynyŋ № 10 ört söndıru bölımı bastyǧynyŋ orynbasary tūrǧyn üilerge jaqyn ornalasqan käsıporynda gaz sisternasynyŋ jarylysy kezınde örttı söndıruge basşylyq ettı. Oşaqtan 53 gaz ballony şyǧaryldy. Jedel jäne käsıbi äreketterdıŋ arqasynda adam ölımınıŋ aldyn alu mümkın boldy.
Marapattalǧandar arasynda bılım beru, mädeniet, polisiia qyzmetkerlerı, Erıktıler ligasynyŋ jetekşısı bar.
Mysaly, temırtaulyq pedagog Viacheslav Varzin öz qalasynda bırınşı bolyp balalarǧa robot tehnikasyn üiretıp, informatikadan avtorlyq baǧdarlama men fizikadan ǧylymi-ädıstemelık keşen äzırledı. Respublikalyq jäne halyqaralyq jarystardyŋ jeŋımpazdaryn tärbieledı.
Ä. Saǧynov atyndaǧy Qaraǧandy tehnikalyq universitetınıŋ 20 jasar studentı, bolaşaq säuletşı Arina Bekpaeva mektepten berı volonterlıkpen ainalysady.
Räsımge respublikanyŋ tükpır-tükpırınen QHA Aqsaqaldar keŋesınıŋ töraǧalary, sondai-aq körnektı memleket jäne qoǧam qairatkerlerı, atap aitqanda Sät Toqpaqbaev, Jambyl Artyqbaev, Bürkıtbai Aiaǧan, Etnosaralyq qatynastardy damytu komitetınıŋ töraǧasy Ǧalym Şoikin keldı.
Saltanatty bölımnen keiın Aqsaqaldar keŋesınıŋ respublikalyq otyrysy öttı. Äŋgıme jastardy tärbieleudıŋ, otbasy institutyn nyǧaitudyŋ, dästürlı qūndylyqtardyŋ maŋyzdylyǧy turaly boldy. Qatysuşylar sondai-aq Qazaqstan halqy Assambleiasynyŋ Aqsaqaldar keŋesı bastamasymen qolǧa alynǧan «Adal azamat» jobasyn talqylady.
