Batys Qazaqstan oblysynda órt kezinde kópqabatty úıdiń terezesinen sekirgen balalar aýrýhanaǵa jetkizildi, dep habarlaıdy «Adyrna» ulttyq portaly «Moı Gorod» basylymyna siltep.
«Áleýmettik jelilerde oqıǵa ornynan túsirilgen qorqynyshty beıneler taraýda. Vıdeoda tórtinshi qabattyń terezesinen eki kishkentaı balanyń sekirip jatqanyn kórýge bolady, al tómende olardy er adamdar arnaıy sozylǵan jabynmen ustap almaq bolǵan. Ókinishke qaraı, ekinshi bala qulaǵan kezde jabynnyń sheti úzilip ketken. Eki bala da aýrýhanaǵa jetkizildi. Oblystyq densaýlyq saqtaý basqarmasynyń baspasóz qyzmeti keıinirek olardyń jaǵdaıyna qatysty túsinikteme berýge ýáde berdi», – delingen habarlamada.
Málimetterge sáıkes, órt 22 qarasha kúni tańerteń Aqsaı qalasyndaǵy 10-yqsham aýdandaǵy №19 úıde bolǵan. BQO TJD málimetinshe, tórtinshi qabattaǵy páterde jıhaz ben jeke zattar janǵan. Órttiń aýdany 60 sharshy metrdi qurady. Qutqarýshylar 12 adamdy, onyń ishinde 7 balany evakýaııalaǵan.
Órttiń sebepterin mamandar anyqtap jatyr. Aqsaı qalasynyń ákimdigi bul jaǵdaıdyń baqylaýda ekenin jáne otbasyǵa kómek kórsetiletinin málimdedi.
