Búgin, 28 tamyz - kórnekti memleket jáne qoǵam qaıratkeri Ózbekáli Jánibekovtiń týǵan kúni, dep habarlaıdy "Adyrna" ulttyq portaly.
Ózbekáli Jánibekov 1931 jyly Túrkistan oblysy Otyrar aýdany Saryqamys aýylynda dúnıege kelgen. Etnograf, tarıh ǵylymdarynyń kandıdaty. Qazaq halqynyń ulttyq mádenıetiniń, ana tiliniń, dástúri men ádet-ǵurpynyń jańaryp, damýyna eleýli úles qosqan Memleket qaıratkeri.
20 ǵasyrdyń 70-jyldarynyń ózinde-aq Qoja Ahmet Iasaýı kesenesiniń qalpyna keltirilýine uıytqy boldy. Ózbekáli Jánibekovtiń bastamasymen Qazaqstannyń kóptegen qalalarynda etnografııalyq murajaılar ashyldy, Qazaqstannyń tarıhı jáne mádenı eskertkishterin saqtaý men qalpyna keltirý maqsatyn kózdegen “Arqas” qoǵamy qurylǵan.
Jánibekov “Sherter”, Adyrna”, “Altynaı”, t.b. folklorlyq óner ansamblderin uıymdastyrdy. “Naýryz” meıramynyń, M.Dýlatov, J.Aımaýytov, M.Jumabaev, Sh.Qudaıberdıev esimderiniń halqyna qaıta oralýyna belsene at salysty. Ana tilin damytý baǵdarlamasynyń memlekettik tujyrymdamasyn jasaýǵa qatysty.
“Qazaqtyń ulttyq qol óneri” “Jańǵyryq”, “Ýaqyt kerýeni”, “Jolaıryqta”, “Qazaq kıimi”, “Ejelgi Otyrar”, “Taǵdyr taǵylymy” eńbekteriniń avtory.
Birneshe ret Eńbek Qyzyl Tý ordenimen, medaldermen marapattalǵan.
Qazaq halqynyń ulttyq mádenıeti men ádet-ǵurpynyń jańaryp, damýyna eleýli úles qosqan qaıratker 1998 jyly dúnıeden ótken.
