Jetisý oblysynda AMANAT partııasynyń eks-depýtaty 7 jasar balany zorlady degen kúdikke ilindi. Bul týraly aqparat áleýmettik jelide tarady, dep habarlaıdy “Adyrna” ulttyq portaly
Amanat partııasynyń Aqsý aýdandyq fılıalynyń basshysy delingen Jaqypov Serikqan 7 jasar balaǵa jynystyq sıpattaǵy zorlyq-zombylyq jasady degen kúdikke ilindi.
Aqsý aýdandyq polıııasy kámeletke tolmaǵan balany zorlaý faktisi boıynsha sotqa deıingi tergeý bastalǵanyn rastady.
“Kúdikti ustalyp, qamaýǵa alynǵan. Qajetti sot saraptamalaryn taǵaıyndaýmen tergeý is-sharalary júrgiziledi. Tergeý sheńberindegi ózge de derekter QIJK-niń 201-baby tártibinde taratylýǵa jatpaıdy”, – dep habarlaıdy Aqsý aýdandyq polıııa bóliminiń baspasóz qyzmeti.
Kúdikti ustalyp, ýaqytsha ustaý ızolıatoryna qamalǵan.
Amanat partııasynyń habarlaýynsha, kúdikke ilingen Aqsý aýdandyq fılıalynyń basshysy 1 tamyzda óz erkimen jumystan ketken. Jelidegi aqparatqa qatysty partııanyń oblystyq fılıaly «osy aıda partııa múshelerine qatysty qylmystyq tergeý júrgizilmedi» dep pikir bildirdi.
“Bıyl tamyzda Jetisý oblysyndaǵy «AMANAT» partııasy fılıaldarynyń eshbir qyzmetkeri ákimshilik jaýapkershilikke tartylǵan joq jáne qandaı da bir qylmystyq is boıynsha kúdikti sanalmaıdy. Jetisý oblysyndaǵy «AMANAT» partııasy Aqsý aýdandyq fılıalynyń burynǵy basshysy S. Jaqypovqa keletin bolsaq, ol osy jyly 1 tamyzda ótinish berip, óz erkimen jumystan bosady”, – dep habarlaıdy «AMANAT» partııasy Jetisý oblystyq fılıalynyń baspasóz qyzmeti.
